港股反彈，只需兩個交易日，恒指又重上2萬點大關。噚日大市由頭升到尾，恒指大升455點，力度之勁，出乎意料之外，而H指亦大升297點，逼近1萬點大關。大市今次只係反彈，中期調整之勢未完，反彈完成後將再尋底，估計恒指上到20200，H指上到10200水平，會有較大阻力。
上升股（唔計認股證）好多，接近600隻，連大落後嘅銀建國際（171）都發力，高收2.13元，升5仙，成交更大增到2600多萬股。銀建上周五升破下降軌，噚日再以大成交升破小雙底的頸線（2.12元）阻力，MACD亦出現入貨訊號，短線要到去年11月底高位2.36元才會有較大阻力。
大市升咗5000點，銀建完全冇升過，去年5月股價2.125元，𠵱家又係原地踏步，炒落後，已好有概念，再睇埋PE同P/B，仲更加吸引。
先睇06年度（12月年結）盤數，中期賺3.33億元，預測全年盈利6.2億元（若有特殊項目入賬，將不只此數），每股盈利0.34元。除處理資產包外，銀建仲有地產、投資同基建業務，瓣瓣都係煞食項目，以保守的10倍PE計，股價已值3.40元，預期升幅達6成。
P/B僅0.66倍
講到資產，又係令人㗳糖。06年6月底，每股NAV2.38元，但物業同股票投資升值好勁，好保守估計，每股實際NAV應超逾3.20元，P/B只係0.66倍。紅籌股嘅P/B，講開都係2至3倍，銀建低得不合理。
銀建第2大股東花旗集團去年底減持，但有大行認為佢抵買，大手在市場收集。花旗減持，但股價照升，證明好友手瓜更硬。花旗前前後後已賣出約1.47億股，但全部由3大股東同基金接去，現時直屬中國國務院嘅信達持有4.36億股，佔24.13%，入主後一路加注，可見對公司前景嘅信心；另外仲有2.2億元嘅CB，換股價2.20元。
銀建在2元至2.50元間橫行咗一年半，遲早會破位而上，家下先買一注，到升破2.50元再加碼，等見3字頭，食大茶飯。
郭兆誠