美國「股神」畢菲特願意花時間去小學演講，向兒童灌輸理財知識；美國聯邦儲備局前主席格林斯潘亦話過：「為免年輕人做出錯誤嘅財務決定，理財教育愈早愈好。」網民喺《MSN討論區》就回應，打算買股票送畀啲細路做禮物，培養佢哋嘅理財智慧。
afewthoughts06講：「我4歲大嘅女鍾意睇兒童節目《冒險家多拉》，所以我打算每年都買啲Viacom（該節目製作公司）股票，送畀佢做生日同聖誕禮物，教佢學吓理財，20年後，啲股票仲可以用嚟做買樓嘅首期。」
UrbanChicago話，佢阿爺經常買廸士尼股票，同埋著名玩具廠美泰（Mattel）嘅股票送畀佢，但佢建議：「家長最好用自己嘅名買股票畀子女，等啲仔女有足夠嘅理財能力時，先至將股票送畀佢哋，以免子女過早沽出股票套利。」
LizPulliamWeston講，有啲細路知道自己成為股民後，會留意公司業績，成個大人咁；佢哋見到張股票證書後，亦會好開心。不過，任何未滿18歲嘅美國人，通常唔可以擁有股票；家長如果想同子女揸住啲股票，只可用下列方法：開個託管賬戶，或者聯名賬戶，或者以家長名義持股。
小量密買佣金貴
LovinMe建議家長幫仔女長揸優質股，因為現時只係值40美元嘅股票，二、三十年後可能升至1000美元。unexplained就提醒家長，如果經常購買小量股票送畀子女，經紀佣金會好貴，所以最好減少購買次數，每次入多啲貨。