PEOPLES自從舊年俾祖國中移動買起之後，除咗個朵變成移動人仔，可以話冇乜動作，呢排先叫有番啲聲氣，第一單，係上個星期副主席梁啓雄宣布1年約滿「榮休」。
另一單，就係噚日孖住楓葉國RIM，推出「黑莓」（BlackBerry），仲搵到楓葉國國際貿易部長艾民信撐場，點解移動人仔咁巴閉？無他，RIM同祖國移動係partner，人仔梗係可以子憑母貴啦！
移動人仔CEO鬼佬森周漢森話，冇其他管理層會走，亦冇聽聞公司要rebrand，佢會好掛住雄爺，雄爺永遠係佢嘅良師益友……鬼佬真係寧舍感性。
講番部黑莓，鬼佬森話唔使驚Apple部iPhone，因為大家市場唔同，裝置唔同，佢哋又冇手按鍵盤云云，部iPhone要2008年先殺到亞洲，而據RIM亞太區VPNorm哥哥勞偉強講，全球一共賣咗700萬部黑莓，學個廣告話齋……yo，使乜驚wor又！