「華探長」曹達華的人生大起大落，早年曾在澳門豪賭輸掉以現時巿值計約10億的身家，不過樂觀的他一直生活得快樂和有尊嚴。華叔一直飲食清淡，街坊透露他最愛在茶餐廳打躉，一邊刨馬報，一邊歎咖啡。契女米雪也經常帶他入馬場賭馬，算是在平淡生活中找到快樂調劑品。
曹達華晚年生活低調，兩子女對他很孝順。華叔曾跟兒子居於英國，後來嫌生活苦悶寧願回港，並常相約好友祥嫂、黃夏蕙和鍾應堂等打麻雀。其實華叔向來身體壯健，飲食清淡，最喜歡一班朋友打邊爐。
有潔癖的華叔愛將屋企打掃得一塵不染，又非常注意儀容，每次出席公開場合，總會穿上恤衫和西裝。其實他的契仔契女曾建議請工人照顧其起居飲食，不過華叔以行得走得為由拒絕。近年任何機構邀請華叔出席公開場合，他也會向對方索取一封利是，以示尊重其明星身份。
剪髮愛扭計
曹達華的性格樂善好施，在他當紅的50、60年代，不少藝人曾問他借錢，華叔也非常疏爽，一一答應，還不預期對方還錢。契女米雪定期會為華叔修剪頭髮，她昨在電話中說：「其實都冇講定幾耐剪一次，佢發覺頭髮一長就打電話畀我，每次剪髮佢都幾扭計，唔准我將佢後面同耳仔兩邊啲頭髮剪得太短，只准我修吓，我通常都順佢意，佢剪完就會好乖自己去洗頭。」米雪透露華叔喜歡出街吃飯，每次都會點白切雞和魚頭，貪魚頭夠滑。
余慕蓮避忌
至於曹達華生前所居住的榮華大廈的管理員也對華叔讚不絕口，指他出入均會跟他們打招呼，寓所對面的報紙檔阿姐說：「華叔成日嚟報紙檔買份馬經，然後過隔籬間茶餐廳度馬仔，佢份人好好。」茶餐廳老闆也說：「我細個已經識曹達華，佢睇住我大，佢好鍾意飲呢度嘅咖啡，食蛋治同奶油多。」
此外，曹達華晚年曾跟余慕蓮傳緋聞，昨日余慕蓮強調華叔只是其母鄧美美當年拍戲的拍檔，自己只視華叔為長輩，她在電話中說：「我同佢相差幾十歲，我同佢唔係好熟，佢嘅喪事安排，我乜都唔知。」其實余慕蓮偶然會相約華叔茶敍，但她極力想跟華叔劃清界線，看來對該緋聞確實很抗拒。
採訪、攝影：比華利、娛樂突發組
