全球資金氾濫，除咗股市、滙市同地產外，近年古董同名畫一樣俾人炒到飛起，賭業大亨永利老闆史提芬永利（SteveWynn）買咗幅畢加索名畫《夢》嚟炒；華置大劉劉鑾雄以破紀錄高價1.3億元，投到當代普普藝術代表大師安廸．華荷（AndyWarhol）名作《毛澤東》絲印肖像畫，都成為熱門話題。
佳士得舊年喺全球足足搞咗600幾場拍賣，維起嚟計，兩日就要搞三場拍賣，賣出藝術品總值46.7億美金（300幾億港紙），比05年多36%，仲打破全球拍賣最高成交額紀錄；當中最貴一件係克林姆嘅《阿黛布洛赫鮑爾Ⅱ》，盛惠8793.6萬美金，差唔多成7億港銀。
佳士得話，未來積極拓展杜拜、俄羅斯同中國市場，呢幾個都係近年炙手可熱嘅國家，佳士得果然「無寶不落」。