1972年8月4日，前宗主國殖民地烏干達嘅總統伊廸．阿敏IdiAmin，頒布命令，要烏干達境內嘅5萬名南亞裔居民，喺90日之內離境。伊廸．阿敏亦宣布全面推行本地化，將呢批南亞印度裔居民嘅資產充公。
當年，呢批南亞印度裔居民，其實已經落地生根，不過因為歷史原因，所以每一個人都有大英帝國護照。亦因為有大英帝國護照，所以正當面對勒令離境同資產將會被充公嘅現實，佢哋就紛紛湧往英國。
大家可能會問：「孫柏文今日係唔係想舉例，究竟乜嘢先至叫做真正嘅強政勵治？」冇錯！當年英國政府，面對住一批一批持有大英帝國護照嘅難民，居然可以差唔多喺一夜之間，國會上下議院三讀通過，將呢批持有堅過石堅大英帝國護照嘅人士嘅居英權剝奪。仲要即時畀英女皇簽名，變成法例。當時，仲有大批喺空中飛緊去倫敦希斯路機場嘅飛機，因為法例通過，而需要承擔處置呢批持有大英帝國護照難民嘅責任。
三流權宜之計
雖然完全係無賴嘅政策，完全暴露大英帝國嘅假仁假義、帝國末日之心，不過孫柏文要承認呢個真係一個「強政勵治」嘅政策。大家要記得，呢個政策「強政勵治」嘅原因，不單止係因為可以厚顏無恥咁剝奪大英帝國護照持有者嘅居英權，最重要係剝奪居英權嘅法例可以即時落實。就算空中仲有飛機嚟緊，都一於好少理。
好多人以為，特首Sir曾蔭權係港英政府殖民主義僅存嘅承繼人，不過曾特首可以學到1972年嘅英國政府咩？孫柏文一路都好支持所有想下一代做香港人嘅父母來港生育，現在錯嘅唔係邊防入境政策，而係綜援政策，相信大家都明白我嘅想法。
不過，孫柏文噚日聽到風聲，話政府會宣布開始大力限制大肚婆來港。如果你要限制去平息因為保護主義所以衍生缺乏助產士嘅民憤，呢啲三流權宜之計，我都冇辦法。不過，孫柏文警告政府，如果要限制大肚婆來港，就要喺宣布一刻立即落實限制政策。如果宣布同落實限制有任何時間差別，我哋就會見到大批大批嘅大肚婆蜂擁來港。
傳聞話政府會今日宣布限制大肚婆來港嘅政策，不過要去到2月1日先至實施。如果呢個傳聞係真，我可以擔保呢15日就會係大肚婆湧港嘅高潮。如果馬會要開上下盤，真係可以開喺15日有兩萬個大肚婆。以前香港已經有廢除抵壘政策嘅經驗，歷史第一次發生係悲劇，第二次就係鬧劇。希望曾特首唔好打大肚婆，不過如果要打，就一定要快、狠、毒。
金手指網誌：phatdat.blogspot.com