群星緬懷豁達華探長

群星緬懷豁達華探長

曹達華四日前在英國因胃出血病逝,享年91歲,華叔五、六十年代叱咤粵語片時代,當年與他合作過的舊拍檔如薛家燕、謝賢、曾江和胡楓等,昨日得知老友病逝均惋惜不已。

周潤發:

華叔係一個為人樂觀、豁達嘅前輩,第一次同佢見面係於電影資料館開幕時,佢為香港影壇貢獻良多,我老婆試過喺地鐵撞過華叔仲同佢傾過偈,佢聲音嘹亮,生老病死係人生定律,希望佢去得安詳。

汪明荃:

我較早前知道消息嘅,佢畀我嘅印象好好,我覺得佢好正義,就好似佢飾演嘅探長一樣,而且佢一生貢獻電影。我之前喺英國同佢見過面,仲一齊飲過茶。

薛家燕:

粵語片時代,華叔喺片場好照顧我同寶珠呢班後輩,佢真係一位性格善良敦厚長者。佢舊年喺香港跌親,我去過醫院探佢,本來諗住等佢出院再約飲茶同畀封利是佢,可惜佢又話返英國冇時間,點都諗唔到竟然冇機會啦!

胡楓:

華叔份人好豪爽,對人有求必應,不過拍戲時都好為食,又鍾意賭吓馬仔,佢冇畀貼士我,但就約過我入馬場,我哋各有各買自己嘅心水,佢落注都唔係好大,細細哋玩吓啫,佢都好似唔係大贏家囉!

謝賢:

近年一個一個老朋友離開,都好欷歔吓,我當年同佢合作唔算多,但大家都好好朋友,佢份人好nice,見親面都好好傾,記得我哋合作過一套片,佢扮華探長,喺嗰個年代嚟講,佢好威猛,同𠵱家年代比較梗係唔同咗。

張英才:

電影時代梗係有合作過,今朝睇咗報紙知乜事,都冇話愕唔愕然啦,遲啲都要跟住佢行啦!呢條係人生必經之路,有乜好可惜,個個都要行啦!

曾江:

想當年都同華叔合作無間,佢係圈中嘅好好先生,佢每次喺英國返嚟都會搵我飲茶,華叔以前雖然鍾意賭吓馬仔,偶爾都見佢喺片場刨馬經,不過佢拍戲時就好專業,一定唔會影響進度。其實佢都咁大年紀,我最後一次見佢係上次跌親入醫院。

汪明荃(左)

薛家燕

胡楓

謝賢