喺新城服務咗好耐嘅DJ陳小芝舊年年尾12月5日離職，早排馮仁昭收到封來自新城傳真機嘅告密信，話自從顏聯武做咗新城娛樂台揸弗人，佢會扶自己友上場，唔friend嘅就全部趕走，李麗蕊、啤梨（葉文輝）同范振鋒都無一倖免。不過馮仁昭查探過自從小芝主動辭職後，新城未有行動，反而李麗蕊成班DJ醞釀一齊走，新城掉番轉頭安撫佢哋，唔想一次過走咁多DJ。
快咇接棒
陳小芝離職時係創作總監，𠵱家佢個位畀咗顏聯武老友快咇坐。日前馮仁昭致電小芝，佢話：「我唔做因為同公司嘅節目方向有意見出入，我嘅職務作出咗調動，創作唔同咗不如走囉。」問佢同顏聯武嘅關係時，小芝話：「唔熟囉，以前大家返工時間唔同，好少接觸。每個人都有自己合作嘅夥伴，當然想同拍檔合作愉快，我都唔覺得大家合作落去有乜嘢火花。」
新城發言人就話：「其實小芝主持嘅《我芝訂》都停咗一排，由07年1月開始，我哋有新嘅節目編排，調動嘅嘢好多電台、電視台都會有，小芝有自己大計，我哋都係暫停合作啫，新城保留同佢將來合作嘅機會。」
