好多球隊歇冬前後表現判若兩隊，其實將心比己，球員搏咗半季咁辛苦，望咗咁耐先難得有假放，梗會同家人、朋友去輕鬆下。放完假返嚟，狀態肯定就無之前咁好㗎喇！不過比較起上嚟，強隊由於整體人腳同實力較好，又會比弱旅快操起番狀態，呢點讀者們出手前就要特別留意考慮喇！
巴黎聖日耳門早兩日喺歇冬後首場聯賽，人多打人少下，竟然主場輸畀作客未開齋嘅華倫西恩斯！其實聖日耳門贏唔出早已有迹可尋，計埋計埋佢哋連續8場都未贏過。今季踢咗19場先贏得4場，勝出率只得兩成，試問點信得過？
聖日耳門呢場法甲嘅對手圖盧茲，儘管冬休前3連敗，不過剛返嚟對住「一哥」里昂就照贏可也。雖然圖盧茲93年至今7次作客聖日耳門得3和4負未贏過，不過𠵱家嘅聖日耳門已非當日勁旅；相反圖盧茲今季兩對班霸里昂，就1勝1和，保持不敗，顯見唔係善男信女。今場受讓之下，我揀「讓球主客和」的「客勝」。
阿鵬
有線球彩台主持
電郵：[email protected]