周中盃賽未踢已覺冇睇頭！天寒地凍，香港時間半夜開波，搵鬼睇咩……加上唔係強弱懸殊，就係好似西班牙盃咁，首回合已經贏咗，次回合隨時留力，呢啲波，點估？
一直都有個疑問，就係西班牙人點睇西班牙盃？呢個賽事有逾百年歷史，係當年嘅皇馬主席CarlosPadros，為慶祝西班牙國王阿方索13世登基而建議搞呢個賽事，擦鞋擦到出面！
歷屆中，畢爾包、皇馬、皇蘇、巴塞都攞過唔少次冠軍。皇馬、皇蘇捧盃人之常情，話晒都係皇帝嘅人，點都要搏隻盃。奇怪在點解巴塞同畢爾包呢啲反中央嘅球會都有興趣玩呢個遊戲呢？
周中次回合賽事，我較留意馬體會同華倫西亞，呢兩隊都係首回合和波兼開「細」，我深信兩隊次回合可以贏波，話晒上周末，大家都大炒對手，球隊狀態甚佳！至於西維爾同皇馬，前者上場聯賽突然中波瘟毒輸波，另外貝廸斯有力90分鐘守和皇馬，所以，我避開「主客和」，兩場波要入球「細」算啦！
周鵬
商業1台《球迷集中贏》主持
電郵：[email protected]