工商銀行去年創下全球最大公開招股嘅奇迹，工行行長楊凱生上周六出席第11屆中國資本市場論壇時話，上市後，國有股增值7000億元人仔，要超過全球市值最大銀行花旗，指日可待。
佢解釋，花旗現在市值大概2700億美元，工行市值距花旗尚差200幾億美元，即1500億元人民幣，「按照工行總股數，好易計出股票升多少就可以超過花旗，工行要成為全球市值最大的銀行呢個目標，並非遙不可及。」
工行可望成為全球銀行界一哥，佢哋30萬員工嘅努力又點可以抹煞。據工行城市金融研究所所長詹向陽講，為咗喺全世界面前重塑國有銀行形象，工行員工已經凍薪10年。
10年磨得一劍
詹所長喺國內一個金融論壇上透露，工行能夠成功上市，絕對係10年先磨得一劍，因為工行30萬員工喺過去10年基本上冇加過人工，佢哋嘅工資水平可以話係國內銀行中最低嘅，加上知道自己任重道遠，佢哋過去亦花咗10年時間，消化不良資產嘅包袱。
不過，據工行上市時嘅招股文件披露，05年度員工嘅工資及獎金達189.75億人仔元，較04年度嘅147.67億元，增加42.08億元或28%，另外，04年度又比03年度嘅134.35億元，升咗13.32億元或接近1成，過去兩年整體加薪起碼四成。招股文件又話，03至05年工資同獎金增加，主要原因係僱員薪酬增加喎，咁係咪代表只有個別員工加咗人工呢？
詹所長又話，𠵱家工行已經有嶄新嘅銀行經營機制，自99年以來，工行發放嘅所有貸款當中，不良比率唔超過1.86%，可以算係全世界最優良嘅資產質量。至於工行未來致勝關鍵，係發展非信貸業務同非信貸收入。計華華話，論功行賞係啱，但既然做出咁好成績，所有員工都應該有啲獎勵，冇理由淨係加畀一少撮人㗎！
[email protected]