俾now𡁻到體無完膚後，幾乎無晒足球嘅有線K寶，轉為攻大家嘅眼球，失驚無神整個10蚊睇一世計劃，有幾驚嚇？睇怕只係嚇親無綫同亞視兩個免費電視台！事關K寶拎住個收費電視牌，分分鐘可以走罅做免費電視可以做嘅嘢，即係做無記同A記世界，據聞，無記老細六叔（其實即係六嬸）、A記老細愛國祺同長樂仔可能聯手，向官府「告狀」!
A記SVP兼總發言人鄺凱迎話，會先了解清楚個牌照條款同埋K寶個plan點出，如果利益受傷害咪出聲囉，佢哋亦會同無記溝通溝通，而無記都話會受溝……係嘅，爭取大棚福利一定要合作！照咁睇，𠵱家似乎已經唔再係now同K寶隻揪，而係兩個叔父都企埋響二少嗰邊，一齊招呼K寶光仔。
講番A記，一向應酬娛記多嘅COO余統浩，噚日孖鄺Sir同班財經記者嚟次飯局，預習一吓上市公司管理層生涯，余總話，上市絕對係A記目標，上市前會再引入一名香港股東，至於係邊位？佢答：「香港哋搞傳媒，唔係富豪邊搞到。」大家自己估囉！
余統浩退休唔成
之前傳聞余總因為搞上市搞極都搞唔到，被迫退下，又係咪堅呢？當事人話，年紀經已一把，諗頭唔夠班後生勁，所以向過陳生（即係愛國祺）申請退休，但唔獲批，而鄺Sir就補充話，申請不遂至少要3年後先可以重提。
其實余總謙啫，A記噚日宣布成立獨立娛樂製作公司「亞洲娛樂製作」（會拍劇、做藝人管理、搞演唱會之類）就係佢度出嚟，而噚日兩個幾鐘，余總諗到好多橋sell畀各大報紙老闆，若然佢整番個「余總飯局」，一定唔會比隔籬台志雲大師遜色！
附註：爭啲唔記得，余總話，A記仝人今年實有人工加，真係恭喜恭喜！
[email protected]