香港人做乜都要有效率，行街shopping都唔例外，要揀乜都有又方便就腳嘅商場，一次過滿足晒所有願望。一啲唔就腳嘅商場，就自然要搞搞新意思，加多啲新嘢嚟吸引人。好似合和嘅九龍灣EMax（即喺九龍灣國際展貿中心），明知位置隔涉，做普通商場好難突圍，所以改建後都用展覽館做主打，仲加埋保齡球場，明顯要同其他商場走唔同路線。
租用50艘吊船
除咗主題唔同人撞，個look都要與別不同至得，佢哋第一擊就係花成千萬去幫個場做facial，點做法？咪係將外牆變做巨型畫布，任由幾十個保良局嘅小朋友自由發揮畫餐飽。今個星期三，呢班小畫家就會合力炮製一幅全港最大手繪外牆畫，之後會申請入健力士世界紀錄，等全球都知。合和總共要租用50艘吊船至可以協助完成呢幅「世界名畫」。
合和當日仲會介紹埋用過億起嘅「匯星廳」表演場，新聞人物太子爺董事副總經理胡文新（圖）都會現身，合和咁揼本，小胡又親力親為，擺明係要呢個場只許成功、不許失敗。