每個女人見到鑽石珠寶都愛不釋手，也不會放過任何爭妍鬥麗的機會，無綫07年80集重頭長劇《珠光寶氣》四位女主角，為配合劇中角色分別配戴過千萬首飾出場鬥一番，行頭比起台慶時更有過之而無不及，身材出眾的黎姿以終極性感打扮力壓其他花旦，蔡少芬戴上九卡鑽戒更稱「個心都跳咗出嚟」。
黎姿、蔡少芬、邵美琪、鍾嘉欣、林保怡、陳豪及王喜等，昨日在將軍澳電視廣播城為無綫新劇《珠光寶氣》試造型，為了配合劇中造型，眾演員更獲寶珠首飾商贊助拍攝，女藝員昨日即率先配戴過千萬首飾出場大晒冷，其中以配戴價值一千三百多萬鑽飾、身穿火紅色低胸連身裙的黎姿最為搶鏡。
蔡少芬自誇身材好
黎姿表示身上的低胸裙乃終極性感，對於自己成為全場最搶鏡及最高身價女藝員，她說：「個個都靚，公司幫我搵咗Valentino贊助做戲服，呢條裙都係今日送到我手後先知咁性感，今次都算係超出我極限。」問到會否擔心走光，黎姿說：「都驚㗎！我本身好少買呢類型嘅衫，不過都貼好晒膠紙保險啲。」
蔡少芬自言當戴上九卡鑽戒時感覺十分震撼，她說：「我個心都跳咗出嚟，粒石重大過我眼珠。」向來自信心十足的她對於黎姿以終極性感搶鏡未有太擔心，蔡少芬說：「我呢啲咁好身材嘅着乜都靚，呢件衫係公司揀嘅，我覺得都突出到珠光寶氣，總之大家都好高貴大方。」劇中蔡少芬會為了金錢而與岳華發生一段忘年戀，問到現實中會否希望嫁個有錢人，她說：「咁唔一定有錢就無真愛嘅，愛情係乜嘢都可以衝破嘅。」
林保怡王喜零交流
此外，林保怡及王喜自從早前合作拍攝無綫節目《江山美人》後一直傳出不和，兩人稍後將於《珠》劇中合作，昨日兩人出場後明顯未有太多交流，雖然他們均向記者表示不擔心再次傳出不和，林保怡更表示欲與王喜合照，但活動一完後，王喜已急步離去。
採訪：王崇穎
攝影：林德雄
