呢部價值＄2,000,000嘅《StarHorse2》響日本Hit得好緊要，因為佢嘅馬匹同賽事，都係依足真實情況；《StarHorse2》嚟咗香港，$36開卡，連埋配種、養馬、訓練騎師，出賽一次分分鐘要$20，但仍有班忠心馬迷由朝早煲到收工，點解？「我鍾意佢有精英大師，好有真實感。」
撰文：陳福榮
Model：Zita
鳴謝：荃灣天天遊戲機中心
Hit完質素較次嘅硬膠馬機後，代理商終於入《StarHorse2SecondFusion》呢款堪稱全港最豪街機，三屏幕超真實畫面，馬仔競走時幾乎同真嘅一樣，再加埋大班椅咁款嘅高科技TouchScreenPanel座位，稱佢為當今頂級街機享受都絕不誇張。
超豪華屏幕如置身跑馬地
樣樣都講錢
相比起幾年前勁多人玩嘅《DOC》，《StarHorse2》較重馬匹血統，仲可自行操練馬匹功夫，但每個項目都要畀錢，例如配種最平20個Credits、操馬4個Credits、訓練騎師1個Credits、出賽10個Credits等，畀咗$36做馬主，唔贏馬而又要出賽，分分鐘要$20一局㗎。
電腦贈馬匹評語
除咗操馬養馬，開卡另一目的係訓練新牌仔騎師，一來幫匹馬參賽，仲會獲得電腦馬匹嘅騎乘聘約，收額外SH分數，能力亦會提升。
不過搵電腦控制嘅騎師參賽亦有其他好處，事關贏到嘅話會自願幫你隻馬操多一課，贈你一句關於能力值嘅評語，基於遊戲係永遠唔會顯示馬匹嘅任何能力，所以就要根據佢吔嘅說話判斷馬匹到底係第一班定第七班貨色。
由於報名嗰陣係唔會知係咪爛地，所以備有場地適應性嘅馬就比較着數，而且不斷Keep住玩落去就會隨機發動「極秘調教」功能，藉此改變馬匹跑法，隻馬到底有冇第二春都係靠晒佢。
小賭怡情創業興家
呢部馬機暫時只容許10人同時比賽，不過配套成熟，大幅延長遊戲壽命，眼光準嘅話想以小博大絕對做得到，贏番一千幾百個Credits就夠你玩成日咯。唔只可以俾人買單Win、位置同串Q等基本方式，仲有大包圍互射同埋馬主之間單睇熱門程度嘅SideBet，但其實最終都係想你入多幾蚊啫。
贏多啲先可預購配種權
隻Game落注會有真Credit落袋，而贏馬則會有SH分數，咁兩者又有咩分別呢？其實Credit係用嚟投注、配種以至參賽等重要步驟，至於SH則係購買馬匹與騎師裝備，以及一些較為無謂裝飾物嘅分數，但如果想改大個馬房甚至預購配種權，單靠真金白銀買嘅Credit係唔夠嘅，係需要SH嘅協助，換言之有錢並唔係大晒。
挑戰日本馬王
如果熟悉日本跑馬行情，就一定知道嗰隻「大震撼」勁到爆燈，掃走三冠仲狂贏GI比賽，仲喺法國凱旋門大賽入圍㖭，聰明嘅世嘉睇準呢點，就將包括「大震撼」在內嘅各匹名馬作為挑機對手，依足歷史喺指定場次出嚟任大家挑戰。聽班「馬主」講，當輪到「精英大師」佢哋出場嗰陣，就算自己隻馬養到曉飛都唔易贏，輸番兩三個馬位全程食塵都係等閒事，所以千祈咪睇低香港班代表呀！
新進馬主點睇《SH2》
就小記所見，雖然呢部機消費一啲都唔平，但過咗午飯時間就開始多人，五六點更加逼爆舖頭想跟機都難，唔通真係正到咁誇張？不如問吓兩位馬主同靚女Model，聽吓大家點講好過啦。
簡直係前所未有嘅享受，冇諗過打機都可以打得咁豪同過癮！同埋啲音樂效果好好，好似置身馬場咁款。
我以前玩開《DOC》，隔咗好多年先再次投入賽馬世界，都係因為佢冇固定formula俾人跟，無窮變化兼且畫面好靚。
真係見到好多人玩，呢類遊戲機殼愈出愈大，畫面又靚，一入場就俾佢吸引住，即使女仔都難免會望多兩眼。
機種：AC
廠商：Sega
類型：SLG
人數：1-10人
價錢：每2Credits$1