油價係咁跌，美股就係咁升，油價跌令通脹嘅威脅減弱，另一方面又反映經濟活動放慢，美國聯儲局有機會減息，對股市自然有利，雖然呢啲都係有邏輯嘅道理，但係就只係諗好嗰邊，一則油價唔係影響通脹嘅唯一因素，另外經濟滑落嘅壞處如果勁過油價下跌嘅好處，咁樣實際嘅情況就唔會咁理想，不過，短線嚟睇，美股反映緊一種好樂觀嘅諗法，某程度係反映好友大戶話緊事，如果唔係，上禮拜五啲油價反彈，美股都唔會當好消息嚟炒。
大家應該記得俊樺早排提過，美國嗰邊好似「煲」緊一個科網股熱潮，呢個熱潮喺美國嗰邊講到好有Concept，最後係點唔知，不過，睇納指嗰勢，就知道呢個概念唔係剩係煲，係有實際嘅行動，納指日線圖破晒位，上日高收2502，創6年新高，若破埋2550，下個站就係2750，再下個站係3000點，要等幾耐？如果真係炮製熱潮，就應該唔使等好耐。
港股仍然喺好淡惡鬥嘅階段，呢個禮拜對撼嘅場面仲會好多，撐住個市嘅指數股應該離唔開本地銀行股同地產股，當然炒輪就要揀啲最強勢嘅。
新地C輪4638：新地（016）喺上禮拜初炒上100元嗰頭，遇啱大市急回，新地未破100元關就要調整，不過，10日線支持力好強，上禮拜五彈返上嚟，高收93.75元，睇成交變化，大戶已完成收集，反彈可試100元，破位先睇105元。新地C輪4638報收61仙，槓桿率15.4倍（有效8.3倍），對沖值0.54，正股升上100元同105元，4638應該企喺98仙同1.35元樓上，現價買，正股跌穿91元止蝕。
俊 樺