退咗休嘅前首席大法官楊鐵樑（圖），噚日到中環香港會食晏，八方多口問楊官識唔識呃綜援罪成嘅退休高院法官李栢儉，佢諗咗一諗，話識咗好多年，但係做同事嘅時間好短。八方又問佢對呢單案點睇，楊官即刻縮晒膊，耍手擰頭咁話，「我退休咁多年，都脫晒節啦，唔講喇。」
楊官離開香港會時，仲攞住套《大國崛起》DVD，講起呢輯節目真係大有來頭，中央電視台經三年拍攝，舊年播放引起全國轟動。古仔係講500年以來，九個大國嘅崛起及其興衰史，包括德、日、俄、英、美等國，但就冇包括中國。《大國崛起》被認為係中共政治改革及回歸憲法嘅先聲，楊官煲呢套碟，又點會脫節呢？