年近歲晚，有保安公司冇糧出，約一千名員工會冇工做，估計欠薪及強積金加加埋埋約一千萬元。冇糧出，怨邊個？梗係怨老闆啦，竟然有保安員埋怨政府，埋怨曾特首，真係攞嚟講，分不清誰是誰非，唔通凡係做政府判頭，接政府柯打嘅公司，一旦周轉不靈，都要政府墊支薪水？
基層員工因切身利益，感情作祟，講錯嘢還可當佢哋唔識，議員都噏埋一份，就證明啲議員係為咗選票而做事，乜都睇唔見，水平好有問題。
工聯會議員陳婉嫻話銀行無社會道德，個老闆又話銀行無情，簡直係屈銀行代為出糧。賓架陳唔知邊間銀行借錢畀保安公司，雖然唔關佢事，亦大為不忿。賓架陳話：「我哋打開門口做生意，借錢畀人，自然有一套風險監控制度，否則金管局唔肯過我哋。我問銀行點會無緣無故停止某些客戶透支（OD）吖，梗係個客戶已有拖賬紀錄，OD超額，逾期不還等等事情，先至會對客戶說不。你話冇錢出糧，叫銀行特別通融，通融得幾多次？銀行係善堂，還是破產欠薪基金？陳婉嫻公開話銀行冇社會責任，施展政治壓力，將大陸、台灣啲作風帶嚟香港，就係官僚議員指揮銀行貸款！台灣啲議員好惡㗎，銀行追收壞賬，有啲議員受遊說就出面阻止，聲大夾惡㖭。香港如果變成咁，就做唔成世界級金融中心咯！」
銀行借錢畀一啲公司，除咗一般抵押品之外，通常會有assignmentofcontract，將服務合同列明嘅收入交畀銀行，銀行扣除貸款之後，餘款可供公司使用（例如出糧、交租），銀行絕無義務代公司出糧。
出糧冇錢，完全係公司理財不善或生意額少，少到低於每月營運費用之故，一旦出現呢類情況，銀行偵察到，就會密切注視戶口資金來往，隨時凍結貸款。喺商場打滾數十年嘅老闆冇可能唔知嘅，工會啲議員就天真無邪，不知世界現實啫。受屈之銀行係邊間，寫稿時報紙尚未報道。按理金管局任總裁應出句聲，支持銀行不受政治干預吖。