大笨象滙豐控股自從舊年底預警，北美按揭質素轉差，令第3季核心業務增長放緩後，即時四面楚歌，投資者用腳投票，即係沽貨，傳媒口誅筆伐，總之都係一句──狂插。
為力挽狂瀾，英國報章《觀察家報》噚日就話，滙控將喺半年內增添兩名非執行董事，加強董事會內部嘅制衡，兼且喺外面聘請財經公關顧問，實行省靚番個招牌，叫番醒呢間獅子銀行。
其實滙控董事會今個月已換入新血，包括委任前墨西哥央行副行長趙達賢加盟，又將曾經喺美資投資銀行高盛做過嘅駱耀文，提升做高級獨立非執董。
改作風 請公關
加埋晒，滙控董事會現有19位董事，包括14位獨立非執董、兩位非執董同3位執董。若加多兩位非執董，成個董事會有21位董事，人強馬壯，咁多人互相制衡，以後再有依郁，都無話可說啦。
《觀察家報》又話，滙控可能喺外面請嘅財經公關顧問，以Maitland及FinancialDynamics呢兩間最有機會攞到呢個大客。據講，前主席龐約翰唔多鍾意同外界解釋公司策略，新主席葛霖就似乎有意改變一吓，打算請公關幫手應該係第一步。
葛霖確實要加把勁，事關《星期日電訊報》較早前報道，話歐洲銀行舊年平均股東總回報達21%，滙控只有4%，葛霖可能因此冇咗根據長期獎勵計劃下、總值達100萬英鎊嘅股份獎勵。滙控上星期四已經跌穿140元，真令人着急，今次呢一步棋，係咪可以叫得醒隻獅子呢？
[email protected]