千呼萬喚始出來的iPhone，上星期終於喺三藩市MacWorldExpo登場，即時成為城中熱話。蘋果行政總裁喬布斯（SteveJobs）誇口話，iPhone比𠵱家嘅智能手機先進5年，仲話08年會賣出1000萬部。究竟呢個如意算盤，係咪真係打得響？
《CNNMoney》喺網上進行嘅一項民意調查，結果顯示，有份投票嘅3.52萬人中，近七成人表示打算買iPhone，但當中近四成話要等再平啲先買；至於表態話冇意欲買兼認為iPhone功能太複雜嘅就佔21%，另有一成人仲未決定。
機迷嫌貴 十五十六
其實，喺《MSN》討論區度講明唔會買iPhone嘅網友，多數都係嫌貴。網友unxplained直言：「499蚊美金（約3892港元）實在貴到完全唔需要考慮！如果真係要買，都會等佢推出一段時間後、平番啲先再諗。」
wackychic就話：「3年後，話唔定iPhone會跌到200蚊，又或者同電訊公司簽兩年約，就可以用50蚊買機呢！」
SmarterThanEver就話，佢部iPod啱啱畀咗佢男朋友用，咁啱佢用開嗰個電訊網絡嘅合約又就嚟到期，所以打算轉台去Cingular，睇吓買手機有冇回贈，如果有，佢都會考慮買iPhone。
iPhone行貨6月會先喺美國推出，第四季輪到歐洲，香港就要明年先有，所以香港嘅機迷有大把時間諗吓買定唔買，或者睇吓啲外國用家嘅反應，再考慮都未遲。