新世界發展旗下新創建，噚日喺灣仔港灣道運動場舉行一年一度同樂日，新世界主席彤叔鄭裕彤外遊缺席，身為新創建主席嘅純官鄭家純當然走唔甩。
今年係新創建第6年搞同樂日，主題玩中國文化，響出面請人嚟表演擊鼓，非常有睇頭。新創建喺中港澳三地，有4.3萬名員工，近期股市大旺，經濟向好，間間公司話加人工，華華自然要幫口問吓純官意思。
純官喜孜孜話，新創建近年成績好，每年生意有增長，一定要獎勵員工，會有人工加，加幾多仲要商量吓，但好快有結果。新創建所有同事聽到老闆咁講，應該更加畀心機做嘢啦。
確實，新創建嘅同事每年都全情參與同樂日活動。舊年新創建請咗歌手陳潔靈做表演嘉賓，今年就搵咗一班曾參與公司歌唱比賽嘅得獎者又唱又跳，仲係勁有水準嗰隻，氣氛一流。