情到濃時，梗係想有個愛巢，過吓二人世界；但如果情已逝，安樂窩好易變「蘇州屎」。網友shijuku唔知係咪有咁嘅煩惱，佢喺《香港討論區》問大家：「有冇人係因為層樓，而同另一半繼續一齊？本來大家都冇感情，但係因為一齊供樓，無奈繼續……」
各位網友一聽，即刻高呼咪制，因為隨時會演變成悲劇。fwho話：「負資產就無計啦……如果唔係，賣咗佢，分錢囉……仲一齊住？除非只係其中一個變心，如果兩個都變，仲住埋一齊，真係好危險㗎。」
miumiujordan就有類似經驗，「99年時同女友買咗層樓，但之後散咗，佢搬走，我一個人供；但之後供唔掂，叫佢返來續供，我搬走；諗住好市賣咗佢一人一半，但個市一直都係谷底（新界西北），最後蝕讓咗層樓畀前女友。」KANNYHUNG123就慘啲：「唉！我倆當初咪諗住買層樓結婚；現在就為層負資產嘅樓，離婚收場。」
雖然大部份回應都好負面，但仍然打擊唔到kannus_wong對未來嘅憧憬，「我同我男朋友一直想有自己屋企，大家向住呢個目標努力，𠵱家仲未有自己層樓，但我哋好期待呢日嘅來臨。」
蝕錢好過冇咗條命
無晒感情仲同住嘅情況唔算罕見，過去都造成唔少慘劇，好似上年11月黃大仙康強苑三屍案咁，所以除非大家都可以冷靜面對，否則蝕錢都好過冇咗條命。買賣物業係投資嘅一種，可能感情生活都差唔多，凡事理性啲、客觀啲，就穩賺不蝕。