前財政司司長梁錦松退隱江湖好一段日子，閒時大家喺報章雜誌見到佢，不外乎湊仔、陪老婆。前幾日，全球最大型私募基金之一黑石（Blackstone）宣布，聘請呢位做咗「住家男」3年嘅資深Banker做大中華區主席兼董事經理，唔講唔知，原來阿松有好多fans撐㗎！
《香港討論區》度有廿幾個網友討論阿松泊到新碼頭單嘢，smartrcd2話阿松係「廢人一個」，隨即引嚟其他網友為佢平反！大家撐阿松嘅理據不外乎覺得佢點都好過唐唐；同埋佢當年偷步買車，只係無政治智慧兼俾人「隊」！
轉去黑石做阿頭
cslun話：「其實我都好鍾意佢……買車單嘢，根本嗰少少錢，佢都唔放喺眼內，啲人唔識貨，佢唔做財政司係香港人走寶。」etchai2002就話：「佢係從商好材料，只係唔適合從政。」blue_kite亦贊成，仲力讚「佢真係有料㗎，不過唔適合從政啫。」
海誓山盟就話：「佢提出嘅政策大方向無錯，但唔係短時期可以見效，仲有當時只係涉嫌偷步買車，其實證明唔到乜嘢！佢係一個好勁嘅人，佢搞經濟會好過唐唐好多倍，可惜佢黑仔，當時跟個老細，仲黑過佢好多好多！」
集體回憶 舊變好
睇嚟，香港人真係好善心，而對阿松嘅「集體回憶」亦非常之好……至少肯定好過董伯伯！