愈來愈多富豪第二代擔任家族上市公司嘅執行董事，為接棒鋪路。
繼大劉劉鑾雄今年26歲嘅兒子劉鳴煒，舊年底入咗華人置業董事局，原先只係做富豪酒店執董嘅羅寶文（主席羅旭瑞位靚女千金），今個月11日做埋世紀城市同百利保嘅執董。即係話，爸爸對個女過去6年嘅工作表現有信心，畀佢加入埋另外兩間上市公司嘅董事局。
唔夠買兩件衫
華華睇吓個通告，發現羅寶文可以從世城同百利保，各獲10萬元董事袍金，另從百利保獲得每個月8900元人工。係，大家冇睇錯，月薪1萬唔夠，下次見到羅生，真係要問吓佢點定出呢個數，呢個數可能只夠羅小姐買兩件衫咋。
不過，羅小姐05年度喺富豪收到190萬元人工。華華估計，羅小姐喺百利保同世城收嘅人工都係象徵式㗎啫。