深入引水道 大澳有蝠氣

深入引水道 大澳有蝠氣

06年過得麻麻哋。朋友話想07年一切重新開始,不如今日帶我去試新嘢。「一於去探險,去引水道睇蝙蝠!」咁得人驚?「中國人話蝠係蝠鼠,好意頭,有福氣呀!」原來蝙蝠住喺大澳。我哋揀咗半路中途落車行路入去,途中摸黑探險,入引水道親身探蝙蝠,再沿途欣賞冬日景色,入到大澳醫吓肚,嘩,07年好似幾正咁喎!

記者︰劉昱蘭 
攝影︰陳盛臣 
模特兒︰Miko、Wing(thegroup)

引水道歷險摸黑睇蝙蝠

入冬睇蝙蝠最啱,因為天氣低過20℃,蝙蝠就鍾意匿喺引水道、荒廢山洞結集,最緊要夠空曠,倒掛住攤唞吓,又有水源可以補充。香港嘅蝙蝠數量唔算少,香港生態旅遊學會總幹事甄永樂透露,全港約有10萬隻蝙蝠,不過所處地方好多都係不毛之地,如九肚山有7,000多隻都無用,條山路比樹阻住,不易到達,而北區嘅蓮麻坑就係禁區。所以深屈算係睇蝙蝠最易嘅地方。
記者本來超惹蚊,今次入到去有水嘅地方,竟然一啖都無被蚊針過。甄先生表示因為蝙蝠係食昆蟲嘅,仲日食2、3千隻,所以我哋行嘅地方好亁淨。但蝙蝠亦有「食齋」嘅,例如短吻果蝠,就如同孫悟空係食果實嘅,九龍區會大啲機會見到。另外香港最常見到嘅仲有東亞家蝠同扁虛頁蝠,蝙蝠品種有10多種。

●喺東涌搭11號巴士,於羌山道深屈道口站落車,沿深屈道慢行半個鐘左右,就會見到深屈(東)引水道的指示牌。

●再行入啲,見到導遊喺呢度停低,點解呢?

●原來係要爬梯落引水道,赤腳落到淺水,好凍呀!不過過咗陣凍痹咗,就無感覺喇……

●喺引水道入口望入去,無底深潭咁黑,真係想縮沙,但山長水遠入到嚟,唔理咁多喇入去喇!

●沿途要避開水滴免濕身,亦要小心地面濕滑,有青苔的確係好跣腳!

●被黑色包圍,普通手電筒都夠照嘅,如果怕黑就因應需要加碼。

●嘩!成群蝙蝠任睇。先見到嘅係大隻嘅大蹄蝠。

●近距離你望清楚吓大蹄蝠,眼細耳大尾部長嘅就係佢。

睇蝠要帶乜?

短褲─因為要澗水,着短褲最方便。
行山涼鞋─引水道又濕又滑,一定要有隻防跣的鞋保護自己。
防水風褸/雨褸─不少滴水位好濕身,或者要小心跌低濕咗都唔怕。
電筒─摸黑深入引水道要靠佢,影蝙蝠相都要靠佢照住蝙蝠,唔係咁黑乜都睇唔到,點對到焦呀。
亁糧─由深屈入一來一回慢慢行,睇蝙蝠,快都要個半鐘,最好有食糧做補給。
*注意:導遊表示:下雨天前往引水道可能有危險,想睇蝙蝠,都係由有經驗人士帶路穩陣啲!

行路入大澳繼續生態遊

出咗引水道,沿海向西行,大概行1個鐘就入到大澳。唔知係咪吸得廢氣太多,聽住海浪聲深呼吸,特別Refreshing。而且唔使再摸黑,行的又是平路,可以欣賞植物蝴蝶,以為冬天都係枯樹遍野滿地枯黃,但原來都有紅葉片片,諗番起四川雲南滿山色彩情景呀。冬天其實唔係想像中咁死寂,當斑蝶普遍都會在河谷結集,偏偏又俾我見到報喜斑粉蝶招搖飛過,佢哋反常態地喺10-3月的秋冬期間,成群結隊喺花間採蜜。

●緋紅色心形葉的烏木臼,冬天都唔落葉之餘,春天又會變返綠油油,四季都唔同樣。

●見到著名的楊侯廟同寶珠潭,抵埗大澳!以前村民話寶珠潭三面群山四靈滙聚,就選址呢度建廟保平安。

●翅形尖係公,圓就係乸(圖示),下次睇到報喜斑粉蝶就識分喇。

沿路睇紅樹林

入到大澳最後生態一擊,就在海濱長廊,隔籬個紅樹林啱時候會近距離見到好多蟹仔鳥鷺,沿住長廊一直走傾吓偈睇吓景,成個人Charge足電精神晒。

●去到紅樹林,最鍾意睇啲蟹仔鑽上嚟地面,好似扑儍瓜咁唔知邊度鑽出嚟。

●甄生話要睇紅樹林入冬後就要3點前,潮水未漲好多動物都睇到咁話。

大澳蝙蝠探索

日期:1月20日(星期六)及28日(星期日)
導覽費:每位$50
導覽:甄永樂(香港生態旅遊學會總幹事)
資料:ecotourism.org.hk
查詢:25634422

大澳歎海鮮

睇完日落飽眼福,又係時候食飯飽腹,大澳都係食海鮮出名,一定要食番個海鮮大餐,再沿永安街買埋蝦亁蝦醬做手信,時間啱啱好上車走人喇。

●忍唔住問︰點解啲椒鹽瀨尿蝦有啲咁的骰?原來係大澳附近水域自己打返嚟嘅,Size無保證但保證新鮮。$48

●都話咗大澳係DIY之地,墨魚餅當然都係自家手打貨,點會唔彈牙?$48

●買咗蝦醬都唔可以即開即食,不如整碟蝦醬蒸肉片頂住先,豬肉夠腍又香口唔錯喎。$45

好景海鮮酒家(29855115)
地址︰大澳永安街15號