側田拆骨眼鏡
「呢個牌子眼鏡嘅鏡框夠輕，唔易爛，而且眼鏡個柄可以拆，又可以屈，鍾意點都得嘅，好得意，所以我都買咗兩個。本身我有近視，如果之前一晚做得太夜，第二朝對眼太攰戴唔到隱形眼鏡，就會戴呢啲有框眼鏡，咁就唔使太辛苦喇。」
衞詩狂野飾物
「我身上嘅Rocawear手鈪同頸鏈係呢間公司送畀我嘅，因為我成日都幫襯佢哋買嘢。呢個牌子嘅服飾比較hiphop，好啱我個image，而且我主要唱快歌，所以飾物唔需要太隆重，我會揀一啲適合causalwear嘅飾物嚟戴。其實我好多時會同家姐一齊去行街買衫，我哋買飾物好抵，因為兩個可以輪流戴，唔使驚戴過一次就冇得再戴，咁就唔使咁嘥啦。」
關心妍心意頸鏈
「我呢條chromeheart鏈係一個女仔朋友送畀我嘅聖誕禮物，我覺得個朋友真係好有心思，因為佢將我個名化身喺鏈入面，J代表我嘅英文名Jade，個心代表『心妍』，所以我好鍾意呢條鏈。至於平時買飾物，我就比較鍾意簡單嘅飾物，唔使太誇張，所以見到又簡單又靚嘅首飾時，我都會買定嚟第日襯衫用。」
衞蘭貴價西裝
「呢件衫因為係crossover，所以產量好少，係我上年去日本嘅時候買。件衫有兩種着法，可以反領同唔反領，仲有佢裏面啲花紋好靚，呢件係我咁大個女以嚟着過最貴嘅衫，我都諗咗一陣先捨得買，佢個款都好襟興，又易襯，所以先決定買咗佢囉。」
採訪、攝影：駱華齡、王連連、李珮洳
