音樂頒獎禮過了四分三，獎項究竟是否實至名歸，還是一場musicchair的玩意？華麗戰衣也是這個遊戲的一部份，沒有了A貨「燒鵝裙」，本地時裝設計師鄧達智指薛凱琪（Fiona）前晚在《勁歌》頒獎禮以少女版金色麥當娜（Madonna）出奇制勝，edgy得來有態度，而何韻詩繼續阿梅上身，則有點過火，欠缺自己的時裝「魂魄」，莫非如她的名曲，已經「化蝶」？ 採訪：梁錦雯
Twins騎呢取勝
鄧達智：「其實佢哋出道咗幾年，唔可以再係少女sweetsweet，佢哋件衫幾得意，有啲騎呢，不過反而突出佢哋形象，食正騎呢。騎呢就係佢哋character，佢哋夠娘，上台效果唔錯。」
薛凱琪從未失手
鄧達智：「佢係成班後生女歌手之中最成功，由髮型到衫都好係佢自己feel，好摩登。佢一向着衫都好有自己嘅attitude，未失手過。今次個打扮有啲似初出道嘅麥當娜打扮，不過好edgy，有input自己嘅時裝品味，好高手。」
容祖兒後天補救
容祖兒因在叱咤穿上一件仿Viktor&Rolf「燒鵝裙」，被冠以華麗A后的惡名，今次她率先穿上「正版」Fendi春夏白色迷你裙，鄧達智認為效果不俗：「祖兒冇陳慧琳咁天生麗質，其實佢身形唔差，着今季大興嘅迷你裙，好穩陣，不過可能好多時都係靠形象指導，信心唔夠。」
陳奕迅風褸累事
鄧達智：「其實佢煲呔以上嘅位置係冇事，不過件風褸好似喺旺角買，襯出嚟好騎呢，佢知身形唔好，又因為身形唔好，冇咁多包伏，不嬲着衫都好有sense，所以大家對佢都好有期望，今次太過downtoearth。」
何韻詩過度模仿
鄧達智：「佢之前出席兩個頒獎典禮都好阿梅（梅艷芳）上身，實在太過火，其實佢又唔係一個新人，出咗嚟一段時間，唔應該上身太耐，都唔係一件好事。」
側田太平民化
鄧達智：「歌星係應該有性格，唔須要blacktie都可以好有個性，但係側田太過牛記笠記，好唔配合大會，太過街頭look，好似平時出街打扮，上台係要有的嘢睇。」
