去年12月上市嘅新股當中，唔少係好嘢，只不過畀當時嘅熱門新股搶去風頭，其中一隻係金達控股（528），上市首日衝完一輪回歸平靜，跌近招股價1.75元橫行，股價兜完一輪底後，上星期五突現大成交掃上，似係收集完成開車。
金達於浙江省生產亞麻紗，所謂亞麻紗，係來自Linumusitatissimum呢種植物嘅亞麻纖維作為原料，加工製成為紗及布料，最終製成多類產品，包括成衣、家居紡織及針織品，而金達係業內龍頭一哥，旗下浙江金元於04、05年及06年上半年名列中國亞麻出口企業榜首。
由於05年6月起，中歐協議限制10項紡織產品（包括亞麻紗）每年出口量，至07年底每年的出口增長於10%內，金達於是要諗其他市場，去年上半年其中國內銷比率已由約22%增至40%，出口比率降至6成，有內銷概念，估值理應較其他紡織股為高。荷銀上市時已持有金達4500萬股，於上市首日再以平均價2.425元增持2200萬股，係乎對公司好有信心。近日福田（420）、冠華（539）等紡織股紛紛展現強勢，金達不妨順勢炒番轉。
摩通狂買中通信
恒指服務公司新一次定期檢討喺2月9日公布，雖然仲有成個月，但法巴已急不及待發表報告預先做估計，認為工行（1398）與國壽（2628）都可成功染藍，其中工行佔恒指比重更可望超過和黃（013）成為第3大藍籌股，並指中海（688）也是黑馬。
至於H指新貴，料有工行、招行（3968）及半新股中交（1800）、中煤能源（1898）和中國通信服務（552）。以上半新股中，中煤上周五固然強勢，但數到峯迴路轉，當數中通信，尾市畀摩通格格剔，踢高兩毫幾子收市，圖表現試底成功之長尾十字，反映有人想中通短期炒上。
歐陽風