日食、中菜巧刀工！韓國菜龜背炭火燒就聽過，玩刀章仲要係傳統菜？唔識！銅鑼灣新開試業MrKim，打開門做生意，但話明唔就你香港人，韓籍行政總廚Eric：「呢度100%韓式製法，做Homemade韓菜！」呢度普通如辣泡菜，都堅持自己整！更特別係個照燒牛肉，竟然將8cm丁方牛肋骨，化身作宣紙咁長「薄片肥牛」，呢個製法原來係韓食傳統！
記者：朱崇德
攝影：陳偉強、林栢鈞
香港人根深柢固，韓國菜等於龜背自助火鍋：「香港特色韓菜雖則好味，但傳統唔係咁囉；首先韓菜並冇『一爐雙食』，燒烤傳統上亦冇羊肉、海鮮！簡單如泡菜，香港食肆為適應市場而減辣！」原來MrKim上至老闆，以至廚房的大廚、二廚，全部都係韓國人；開店就係為咗想食思鄉韓菜！
牛肋骨原是垃圾
店中招牌菜首推照燒牛肋骨；韓國人一向喜歡食牛，但1950年韓戰前，牛肋骨因難煮、難食用，所以原是一種被廢棄的垃圾！戰後蕭條，有人想出以牛肋骨作菜！起初只是巴士站旁的廉價街邊小吃，但一食先發現其美味，現在則成全牛最矜貴部份！由於以牛肋骨作菜始於「牛市場」水原市（Suwon），所以呢味韓式照燒牛肋骨就統稱為SuwonGallbi。
照燒牛肋骨$140
美國安格斯牛肋骨，肥瘦分布好勻稱，一睇就知上等貨：「薄切牛片最緊要是掌握溫度，太凍肥肉位會散，太暖又切唔薄！」片薄後再醃照燒汁，比原嚿肋骨真係入味好多！「醬汁加有生果，以果糖增添其蜜香，天然又惹味！」入口面層微微焦，輕咬即化，但又保留肋骨位獨有的煙韌、骨香口感，一客有點嫌太少！
牛肋骨片肉ShowTime
泡菜豚肉卷$128
五花腩？東坡肉？非也！醬醃五花腩，燜至軟身，油脂冇乜，肉香四溢；簡單以黃芽白加泡菜包裹同食，最特別是泡菜，因是自家製，辣香又新鮮！其實泡菜中還加入了松子同栗子絲，以增其香、脆口感！
特式韭菜薄餅$40
入口韭菜好搶！韓國麵粉黏性高，做薄餅特別腍；製作卷狀好處是卷心位有點蛋香兼水凝香滑：「秘訣是將6成熟薄餅上鐵Pan，先有滑溜口感！」
紅豆刨冰$45
韓國夏日美食！紅豆醬、雜果、冰，材料簡單；不過紅豆醬軟而腍，仲有粒粒口感。臨食前，面撒果仁粉同煉奶，香香甜甜，連食啖冰都有味！
食神評級(5粒★滿分）
服務★★★★☆
價錢★★★☆☆
裝修★★★☆☆
讚：韓菜原來都可以做得咁精緻！純韓國風味，甜、辣味道大加碼，好似去咗韓國食一樣。
彈：可能試業關係，出菜時間真係幾耐，有待改善。
睇路搵食：MrKim（28330113）
地址：銅鑼灣駱克道491-499京都廣場3字樓
營業時間：
中午12:00-下午3:00
傍晚6:00-晚上11:00