楊千嬅與金牌經理人黃柏高（Paco）結束合作關係，以天價轉投林建岳旗下，唱片方面被安排到黎明的AMusic公司，她初到貴境與黎明開會，竟是火花四濺，各持己見，也許互相還未摸清對方。千嬅坦言今次轉公司的決定甚為艱難，但她卻不介意將其星途豪賭一鋪。 撰文：陳月媚
事業 轉會如賭博
天下無不散之筵席，楊千嬅與黃柏高兩人維持了6年的經理人合作關係，最終要結束，由今年開始她正式轉投林建岳旗下的寰亞電影與AMusic唱片公司。每位一線歌星面對轉會問題的一年，往往會在幾個樂壇頒獎禮吃白果，但千嬅算是走運，還能在商台《叱咤樂壇流行頒獎典禮》取得我最喜愛的女歌手獎，難怪當晚她上台表演時，激動得走下台擁着Paco來哭。
「梗係試新嘢」
經過6年的合作關係，其實千嬅與Paco已建立很深感情，但最終要蟬過別枝，千嬅解釋：「做呢個決定係好難，但考慮到以後嘅長遠發展，我希望可以喺電影方面有更多空間發展，加上要開拓海外市場，呢兩方面寰亞嘅配套似乎比較啱我，先決定過去，但過咗檔，唔代表唔可以再同金牌合作，將來我開演唱會或金牌公司開戲，一樣可以傾合作嘅！」
千嬅形容在娛樂圈發展猶如一場賭博，輸贏不重要，最重要手上還有籌碼可以繼續玩：「好多人問我轉公司係咪明智決定，我就話都係賭一鋪，冇人知係啱定係錯，根本人生就係一場賭博，留喺舊公司係賭，去新公司一樣係賭，與其都係博，梗係試吓新嘢啦！其實黎明（Leon）嘅AMusic簽着我，可能都好頭痕，因為我都係一個幾有要求嘅歌星。」
以往千嬅對黎明認識有限，只知道他是四大天王，從來沒想過黎明會開唱片公司，還做得有聲有色，更想不到是，連她自己也加盟旗下，她笑道：「當林生（林建岳）建議我去黎明間唱片公司，我相信佢嘅安排，因為佢係好老闆，睇嘢有遠見。呢排開始同Leon多咗接觸，我發現佢對市場有遠見同深入了解，捧新人有眼光，連揀歌都有一手，我開始對黎生有唔同睇法，可以肯定佢唔係一個只識揸咪唱歌嘅歌星。」
Leon似Paco
大男人遇着大女人，可能會出現火星撞地球場面，千嬅與黎明近期為唱片開工作會議時，已出現爭拗，千嬅說：「可能我同佢都係歌星出身，大家都係咁執着，佢有佢嘅堅持，我有我嘅見解，可能因為啱啱合作，仲未搵到共識，但我相信溝通多咗，自然會搵到共識。拗還拗，但有樣嘢我都要讚吓佢，我發現佢都幾專業，真係做足功課先嚟開會，做嘢實牙實齒，以前Paco都係咁，所以我對佢幾有信心，所以拗成點都好，最終我會聽佢講，因為佢嘅成績畀我睇到，佢做衞蘭同衞詩好成功，如果唔信佢，簽呢間公司做乜？」
