肥佬黎來電講佢家庭增加一名新成員，最細嘅仔已經出世，得閒嘅話，要左丁山見吓佢位乖乖。
真係恭喜晒，肥佬黎尚未老，當然彌堅，要生產多五名都冇問題，不過唔知阿嫂肯唔肯啫。左丁山笑佢細仔大學畢業之時，佢或者已經超過八十歲，肥佬計一計，話：「差唔多啦，棟支枴杖都要去畢業禮。」
諗諗吓，假如小小黎係神童，十零歲就可以大學畢業啦，但神童係天生嘅，為人父母者不可強求，希冀自己嘅兒女係神童。呢日睇報紙，一名大馬神童英年早逝，三十一歲就魂歸天國，今年一月八日下葬。唉吔，做神童原來未必值得恭喜。
呢位大馬神童張世明，智商高達148，十一歲小學畢業，十二歲由中一跳升大學，十三歲入MIT，創下健力士世界紀錄。一九九二年，未滿十六歲就成為康奈爾大學博士生，九七年取得博士學位，最喜歡原子物理、高能物理，之後就閉關唔見人，原來因為外間對佢期望太大，承受不了巨大壓力，患上精神病，變成孤僻，沉默寡言，不能融入社會，尋且染上精神病，有自殺傾向，與病魔搏鬥幾年，卒於一月六日病逝。
睇完呢段「神童史」，不勝欷歔，為佢父母感到悲痛。佢有一位細妹，四歲就在泳池溺斃，父母以為有神童可耀名聲，顯父母，光宗耀祖，喺馬來西亞為華人爭光，點知神童竟成為馬來西亞華人社會之痛。
孔融三歲能讓梨，小時了了，大未必佳，人生真係好難預料，故此有時想起，兒女叫做天資聰穎，但成不了尖子，中小學成績得過且過，未必係激氣事，可能係blessingindisguise。左丁山見過一位十五歲學生入大學，但因心智未成熟，喺大學掛住玩，必修科肥佬被勸喻離校，非常可惜。
蘇東坡詩云：「但願生兒愚且魯，無災無難到公卿」，相信係為人父母肺腑之言。不過此語有語病，昔日科舉時代，兒子既愚且魯，點可以讀詩書考狀元，憑進士資格進身官僚系統，升到做公卿呀。