吳文忻將整容經歷公開，成為香港開埠首位整容明星代言人後，佢噚日聯同施刀嘅韓國整容醫生，喺尖沙嘴舉行整容知識講座，整容醫生同佢見面後，隨即觀察佢喺手術後三星期係咪恢復得完美，文忻塊面已經消晒腫，不過皮膚望落就唔係咁靚，尤其個額頭好似有一點點暗瘡印咁，佢話：「心理同生理最難過嘅第一個月已經過咗，醫生話三個月之後最自然。」
升級至32C
變靚D同時邀得黃宗澤舊女友、2006年落選亞姐甄穎珊擔任第二代整容代言人。甄穎珊話佢喺五年前曾經接受唔正確嘅整容手術，分別喺鼻同埋乳房注入早前被定為影響健康嘅物質PAAG，佢話：「PAAG超過六、七年會硬化，雖然暫時未有唔妥，但係一旦硬化，最嚴重須成個胸切除，為咗自己健康同屋企人着想，所以我決定做手術。」
甄穎珊話會將乳房的PAAG抽出，並加入矽袋，再升CUP至32C，手術將會喺下星期喺香港做，之後再去韓國整容。
