究竟邊支英超球隊最鍾意壞人好事？答案係倫敦球隊富咸。前晚佢哋喺英超作客迫和韋斯咸3:3後，頭尾5次靠完場前入波而搶到分，仲專門作客搞同市球隊。
車路士亦遭「毒手」
富咸前晚喺倫敦打吡戰作客打緊護級戰嘅韋斯咸，靠後衞基斯坦禾喺完場前嘅入球迫和3:3；雖則韋斯咸領隊古比士利賽後指基斯坦禾嘅隊友禾斯入波前犯規，但點都改變唔到失分嘅事實。其實，同韋斯咸一樣打緊護級戰嘅查爾頓亦畀富咸壞過好事，佢哋喺聖誕後主場對富咸，俾後者嘅後衞基度爾喺完場前嘅入波，搞到佢哋由贏2:1變打和2:2。
咪以為富咸淨係同啲護級隊有仇，衞冕冠軍嘅車路士一樣中過招。富咸喺舊年年尾作客史丹福橋球場，保卡尼加喺84分鐘門前執雞射入，令佢哋爆大冷迫和車仔2:2，間接令車仔以6分落後俾榜首嘅曼聯。除咗以上3支倫敦球隊之外，保頓同埋紐卡素都揩過嘢，當中以紐記最慘，喺完場前9分鐘畀富咸嘅麥比廸同保卡尼加各入1粒，由贏1:0變輸1:2。
睇番富咸隊波，佢哋喺賣咗般莫廸之後得番柏巴廸奧普算有星味，其餘好似麥比廸、基斯坦禾同埋米高布朗等都好平凡，但星多亦唔代表成績一定好，家陣喺聯賽經已6場不敗，累積仲有成28分，睇嚟唔駛為護級而煩惱。
「富咸今屆咁鍾意壞人好事，嚟緊喺下個月24號會喺主場對曼聯，唔知到時又會唔會令紅魔失分呢？」