近來因為天星碼頭被拆卸,集體回憶開始被重視,其實另一邊廂的灣仔區亦有不少集體回憶,其中不得不提出名多好嘢食的春園街!當中的老字號最耐有成90幾年歷史,多年來已成為灣仔居民嘅飯堂,充滿人情味!春園街亦受重建計劃影響,清拆行動雖已暫告一段落,現存店舖未有清拆危機,但是當附近幾條街改建為現代化項目之後,這些富人情味的食店面貌定有所改變,想親身感受就要趁手!
記者:林思樂 攝影:林栢鈞
鳴謝:美芝時裝公司
鹵八
滷水汁材料十足
好多人都以為鹵八是開業幾年的新舖,其實老闆之前做咗百幾年賣米生意,後來在石塘咀開鹵八鵝店,6年前搬入春園街,才發現灣仔都有好多同聲同氣嘅潮州人。鹵八的招牌獅頭鵝好巨型,負責人話:「獅頭鵝是鵝類中最大隻,平均1隻重12斤,比廣東燒鵝大隻好多,所以肉較厚,肉味較濃,而我們的鵝全部由汕頭入貨,品質有保證。」除了鵝靚,滷水汁更是重點:「滷水汁秘方用了好多靚材料炮製,可以透露的是用了$200斤的肉桂,出面好多店舖都只用幾十蚊斤的貨色。」食落果然零舍不同,鵝肉比廣東鵝更嫩滑多汁,滷水唔會得個鹹字,有香料的味道,難怪咁大隻鵝每日賣成70隻。
另一搶手貨是滷水鴨舌,特別之處在於鴨舌來貨時大大條,但煮完就縮到細細件,但鹵八就可以做到唔縮水,大件企身又入味,入口一啜就成條骨退出來,咬落爽口。
古老潮州食品豬頭粽就好少地方有得賣,「粽」只是潮州譯音,其實近似豬肉亁,將豬頭肉、五香、藥材炒熟放涼,再壓平切片,食落比肉亁有肉味而不油膩。
鹵八鵝店(28387635)
地址:灣仔春園街20號C至D富園大廈地下
營業時間:10:00am-8:30pm
新景園
鮮椰汁咖喱夠香
新景園已有30年歷史,以前係大牌檔,15年前搬入春園街,演變成專賣咖喱和小炒,咖喱豬扒飯更加賣到街知巷聞。呢度自製適合一般人口味的港式油咖喱,即是以油爆香咖喱粉做膽,採用新鮮椰汁,咖喱入口香。豬扒採用肉質軟滑的巴西靚貨,肥瘦適中,加上即叫即炸好香脆,中間好彈牙,豬扒好食到一日賣百幾磅!
至於暫別2年的咖喱羊𦟌終於重出江湖,負責人梁生話:「早兩年因為來貨太貴而停售,最近見來貨價可接受咪再推出。呢隻新西蘭羊膝唔肥唔羶,腍得來好彈牙!」梁生以前在大牌檔練得一手炒工,亁炒牛河和蒜茸蝦亁炒芥蘭都做得非常出色:「我們的亁炒牛河以米漿蒸成新鮮河粉,米香濃又夠彈牙。」
新景園咖喱小廚(25749172)
地址:灣仔春園街20號地下
營業時間:星期一至六11:30am-3:00pm、5:30pm-9:30pm(星期日休息)
金鳳
鎮店四寶
睇門口就知金鳳好受歡迎,每朝七點和整個下午都有兩條人龍,一條等外賣,一條等位。金鳳已有50多年歷史,10年前由太原街搬至春園街,有四寶至受歡迎-原裝凍奶茶、蛋撻、火腿雞批及菠蘿油,好多灣仔居民都是食金鳳四寶長大,其凍奶茶被不少名人食客稱讚,皆因用鮮牛奶,茶葉份量比較重,能保持茶的濃度和奶的厚度。
蛋撻1日賣600個,皆因酥皮鬆化咬落有層次;雞批皮鬆軟,中間的餡有雞肉和火腿,味道不會太濃;菠蘿油用新鮮牛油,咬落外面皮脆,麵包鬆軟到咬完會彈番起,牛油又軟又香濃。餅撻出爐不久就售罄,如果想買兩打就記得打電話預定。好多街坊日日都去金鳳打躉,老闆娘差不多完全講得出街坊名字㖭!
金鳳茶餐廳(25720526)
地址:灣仔春園街41號地下
營業時間:6:45am-7:00pm
楊春雷
秘方涼茶
楊春雷特效涼茶又是3代經營,至少有94年歷史,是港島最老字號涼茶舖,第3代掌門人楊生話:「爺爺清末年在順德行醫,之後來香港在上環開業,主要睇症,再搬來春園街時我父親還是手抱嬰兒,現在父親冥壽94歲,即是起碼有94年歷史。」這裏只有一款涼茶,飲落少少甘但不苦,亦不嗆鼻,非常順喉舒服,秘方94年來未變過,但是時至今日仍一樣咁有效,特別是現代人睡眠不足、容易感冒、成日食肥膩食物就要飲,可排毒、加速新謝代謝、增加抵抗力。
楊春雷特效涼茶(25758307)
地址:灣仔春園街29號地下
營業時間:10:00am-9:30pm
成發
香料最齊
「由阿爺嗰代做起,𠵱家租金貴,唔係好搵到錢,不過會盡量堅持落去。」第3代接班人李生第一句就咁講。成發已有80年歷史,1920年第一代創辦人李生在上環開咖喱香料店,當時的椰子要用人手破開。後來三度搬遷,輾轉搬入春園街。成發是少有賣新鮮椰汁的店舖,新景園都向他們入貨,所售香料來自印度、泰國、馬來西亞等,李生推介自己在印尼設廠做的雙鷹椰漿,聞起來淡一點但濃度高有真椰香。
成發椰子香料有限公司(25727725)
地址:灣仔春園街18號地下
營業時間:6:00am-7:00pm