早幾日搭飛機去日本，點知架機嘅電視壞咗，全程無電影睇，谷咗一肚氣，於是同啲同事呻吓，點知人稱「算死草」嘅阿羊插嘴問我有冇投訴。我話咁都投訴，佢笑笑口話我唔投訴就笨。
佢話上個月搭聯合航空去新加坡跑馬拉松，返香港嗰程機上嘅電視壞咗，全程冇畫面睇，惟有瞓覺囉。可能有人投訴啦，臨落機前個空姐突然宣布為咗賠償旅客嘅損失，UA航空會賠番啲現金券同飛行里數畀乘客。
阿羊話當時心諗，冇電視睇啫，唔慌會賠好多錢啦，但填咗又冇蝕底，同機有啲乘客都冇填到，可能佢哋覺得費事煩啦，「點知早幾日收到封信，竟然收到張聯合航空嘅200蚊美金贈券（港幣1,560元），可以用喺任何經濟客位，嚇咗我一跳。我張去新加坡嗰程機票只係用咗1,500蚊，真喺發達囉！」
逢周一至周四刊出