渣打喺公益慈善工作方面，一直扶助殘疾人士同失明人士，每年一度嘅馬拉松籌款活動，就為呢兩類人士服務。
舊年11月，喺馬來西亞吉隆坡舉行嘅遠南運動會，本港傷殘運動員取得優異成績，渣打就特別表揚佢哋。
渣打銀行噚日特別撥捐25萬元善款，畀香港傷殘人士體育協會，表揚佢哋喺遠南運動會上取得26金、39銀同23銅共79面獎牌，喺總獎牌榜排行第7位嘅佳績。遠南運動會中國香港代表團團長伍澤連話，會好好利用呢筆款項，為08年北京傷殘奧運作好準備。
馬拉松籌款 累計千三萬
渣打香港區營運總監譚何錦文就講到，渣打自1997年至今，透過馬拉松活動，累計為香港傷殘人士體育協會籌得逾1300萬元經費，渣打希望可以培育更多明日之星，為本港爭光。