在現今這個世代，若要改裝一輛適合自己口味的電單車，比從前的確容易得多，機車上任何現成的和特別訂做的配件比比皆是。話雖如此，當真的動起腦筋來找合心水之配件時，又確實有一定難度；正所謂花多眼亂，要在一架本身已是相當高質的機車身上，如大哥大Harley-Davidson般作改動，也真是大傷腦筋；Fatboy車主阿唐，就是少有能將愛駒改得有心思之餘，更可將哈利車本質特性帶出來的Fans！
文：TigerL
攝影：陳盛臣
四個轆變兩個轆
一般人揸開兩個轆，之後改揸四個轆（即係私家車），通常都離不開兩件事；一是因安全問題而遭家人反對，又或是舒適感始終不及私家車，正所謂「好天曬、落雨淋」，除了因工作關係要揸電單車，大部份人也會選擇私家車，但車主阿唐剛好相反，「我以前揸開私家車，但老實講，一出街要泊位就真係頭痛，莫講話錶位、停車場繁忙時間都好難有位，不過嗰時仲未諗過自己會揸電單車㗎！」原來是一次偶然機會下，令阿唐開始不可救藥地深深愛上兩個轆。「有次見朋友嗰架改裝HondaShadow750，除外形極之靚仔外，淨係聽到雄渾有力嘅引擎聲，已經深深吸引着我，就好似話畀我聽呢啲就係揸車應有嘅樂趣！」
為獨特轉噴白色
阿唐的第一部車是HondaMagna250，但因嫌力度未能滿足，所以決定再換上了一部大馬力的車種，而哈利當然也是大部份機車迷心目中的DreamCar，而阿唐當然也是其Fans之一，「經朋友介紹下，我終於搵到終極目標，就係哈利Fatboy！最特別之處係頭尾轆都係原裝密封冚住，其他車無㗎；而原色係深藍，我覺得比較普通，所以轉咗白色，始終白色較特別同少有；而花紋亦係同噴油師傅一齊諗。當然最吸引我係佢嘅引擎聲，無可否認始終係哈利引擎，隔成條街咁遠，未見車淨係聽把聲就知係哈利車！操控性亦很好，雖屬重量級車種，但轉向方面仍非常靈活，從心所欲快慢車都冇問題。如果真係要彈嘅話，唯一係倒後車泊L位時，真係比較費勁。」也難怪平均車重達300kg以上的哈利電單車，對一個只有正常體重60kg左右的人來說，的確需要多點氣力來倒車。
十字軍現香江
千多年前十字軍東征，其實是西方基督教士為奪回聖城耶路撒冷而發動的一場聖戰。眼見阿唐的Fatboy滿布十字軍圖形配件，還以為有甚麼意思：「其實都冇話想表達啲乜，亦唔係宣揚宗教信仰，只係睇書見到靚，自己諗吓改吓設計咗出嚟，忽然之間愛上個Design，所以就加多幾個落車度。之後仲要比專業師傅執，成架車大部份改裝嘅意念都係自己諗出嚟，好似腳踏同埋尾燈等，而有部份係現成嘅！」對着迷於改裝的阿唐，還有很多構想在腦中，「好似車頭我就想全改，頭Fork連頭燈一次過換晒，嘻！但仲諗緊點改，所以𠵱家仲未改得。」阿唐邊說邊手舞足蹈向小記示意，哪些配件是自己設計，哪些要怎樣改等等，高興得如玩着心愛玩具。
直接感覺外人難明
「若有機會選擇第二架車，我會揀HondaGoldwing，你知啦，Goldwing成架私家車咁又大又舒服，但係我估未有咁快換車，始終𠵱家架Fatboy只係揸咗一年，佢畀到我嘅感覺仍然好新鮮，而且我一星期只出一次車，正正式式係假日車，相約一班志同道合嘅機車朋友遊山玩水，呢種電單車獨有文化，其他車種係畀唔到嘅。」小記也絕對認同阿唐的講法，因不喜歡電單車的人，是永遠也沒辦法理解，為甚麼那些皮包鐵的東西，仍然有那麼多愛好者，享受着路面那種能帶給駕駛者直接感覺的樂趣。
鍍銀×白有味道
Harley-DavidsonFatboy
二手車價：約$90,000
改裝費：約$30,000
特別之處：死氣喉（現成買後再改款）、尾十字煞車燈、Seat位、油缸、前後腳踏、頭冚及大量電鍍配件。
查詢：TechnoHarley-DavidsonShowroom（28068444）