「成功男士背後一定有個女人」,喺警隊呢個出生入死嘅行業,老公喺出面槍林彈雨,做老婆嘅邊個唔提心吊膽?「一哥」李明逵完成歷史任務,日內功成身退,噚日佢最後一次出席官式場合,一直喺佢背後發光發熱嘅老婆許雁芬點可以冇份,仲帶埋乖仔Philip一齊現身打氣。李公子英明神武,喺英倫行醫,今次專登放假返嚟支持老竇榮休。同場仲有新一哥鄧竟成太座,同新二哥任達榮嘅另一半,警太鬥一番,你話邊對最有夫妻相?
𠵱家仲係警隊「一嫂」嘅許雁芬,身穿黑色連身裙,全程笑容滿面,本身都係警隊出身嘅許雁芬假假哋都係madam,眼見老公最後一次以一哥身份主持結業會操,就快可以多啲時間返屋企陪佢,自然開心到笑不攏嘴,佢臨離開會場時,仲不時向在場人士揮手道別,非常大方得體。
一哥乖仔首度曝光
更加難得嘅係,從未喺公眾場合曝過光嘅一哥公子Philip,遠道由英國返嚟捧場。李公子有老竇遺傳,身高六呎,不過大部份時間都眉頭深鎖,一臉嚴肅,似乎不及媽媽咁開懷投入。
噚日除咗李Sir一家,候任一哥鄧竟成同候任二哥任達榮都罕有咁攜眷出席,身穿灰色套裝、戴上珍珠耳環同珍珠襟針、蓄有一把及肩長髮嘅鄧竟成太太全程都好沉默,同佢老公鄧Sir一樣作風低調,表現比較拘謹,笑容稍為欠奉,似乎仲未太適應做一嫂嘅感覺。假以時日,日子有功應該會有改善。
至於任Sir嘅太座就穿着一件粉藍同白色直間嘅絨褸及黑色長褲,呢位候任二嫂蓄短髮、佩戴黑色方形眼鏡,全程都全神貫注睇結業會操,面容較嚴肅,只係間唔中顯露一吓微笑,而且比較少同任Sir或其他賓客交談,比較特立獨行。
李明逵嘅堂大舅、警隊前一哥許淇安都喺儀式上,佢都攜同老婆畀面出席,雖然冇喺公開場合曝光好幾年,但呢位前一嫂外形同以前冇咩變化,包括佢好cool嘅性格。
不過,另一位曾被傳同李Sir唔多啱key嘅前處長曾蔭培,噚日唔覺有出席,或者曾Sir忙於打理新渡輪嘅業務啫。