香港啲樓牆身唔係好厚，大聲啲講嘢，上下左右隔籬鄰舍好多時都可能聽到，「夜媽媽」仲會擾人清夢。
網民memecat99就喺《Uwants討論區》求救，「我樓上嗰家人晚晚一兩點就着高跟鞋行來行去，我已經試過自己拍門叫佢唔好3次、向管理處投訴2次、報警1次都冇用…….如果可幫到我，感激不盡……」Circleooo有啲懷疑，「你有無check過係咪真係有人着住高跟鞋行來行去？定係有其他因素？」
maskedrider就覺得，「好可能你樓上養咗寵物，例如貓或狗，佢哋鍾意半夜跳來跳去，撞跌傢俬雜物。」
網友tythty同adayung都同病相憐，話樓上嗰家人周不時都搬櫈跌麻雀落地，超討厭。
搜集證據贏面大
問法律界人士意見，黃鶴鳴律師話呢樣嘢真係幾難搞，除咗去管理處投訴，惟有事先自己做好工夫，好似集齊曾經向嗰位戶主，或管理處投訴過嘅信件、向差館報案嘅資料，又或者用DV機錄低發生聲響嘅時間同日期，再經民事訴訟告佢違反大廈公契。
當然，個官信唔信你啲證據，真係要上到庭至知。