國中（202）係一隻有潛質起碼翻半番、中線講緊升5倍嘅水務股，飛身撲貨，等食超級大茶飯。國中呢期計劃出售上海及湖南地產項目，已經等緊EGM通過。若然順風順水，項目出售獲利1.04億銀，每股溢利1.86仙，折合兩倍PE，08年度（3月止）業績應該靚爆鏡。又隨住項目出售套現，國中手頭淨現金應該上到3.7億銀，每股等值6.6仙，係國中現價嘅1.5倍。講PE，講淨現金值，吸引到爆。
再講，祖國媒體報道話，全國有一半城市嘅地下水嚴重污染，國中趁住大牛市將資產套現，再大搞污水處理，呢個轉型，食住國策國情，同埋市場熱炒焦點，銜接上，靚絕。國中要反映出售資產現金增值，升到上每股淨現金值6.6仙，現價係咁易都要翻半番；炒國中水務概念，貼住光國（257）呢類熱門股P/B水位，國中現價要升5倍到0.28元。
力華折讓大走勢佳
力寶華潤（156）現價0.218元相對NAV0.55元折讓60%，作為大中華地產投資企業，仲有咁嘅折讓，好吸引。又力華06年度中期（6月止）純利1.27億銀，已經等於05年度純利69%。估計力華嘅證券經紀及投資，下半年繼續大豐收，全年度純利重返兩億銀樓上，PE單位數，講業績，又掂。力華破咗大半年橫行區兼後抽，走勢又一絕。博NAV係咁易收窄到50%，現價都要升26%。
錢雋