提起張文慈（Pinky），可能想起早陣子同葉璇喺《情陷夜中環2》中，由戲內鬥到戲外嘅是是非非，不過最令觀眾留有印象，肯定係每次公開場合，Pinky均毫不錫身，性感裝束谷到行示人。正如佢話齋：「做呢行身形好重要！」就連揀車，Pinky都話要外形先決，起碼要線條靚、夠華麗、唔高調！最後都係揀英國積架X-TypeSpirit，「雖然線條無我咁靚（大笑），不過就似我咁有內涵，表面睇唔出，要慢慢嗒落先知味道！」
文：吳心彥
攝影：伍慶泉
Makeup：HeidiKam
10℃照着短裙
採訪當日天氣嚴寒，上晝更只有10℃，約好Pinky在旺角等，睡眼惺忪嘅小記根本不願起床，拖着那疲乏嘅身軀，見到着住迷你短裙嘅Pinky，還有那修長嘅美腿，令寒風之下有如出現一股暖流，我同攝影師當堂醒晒，所以話同靚女影相，份外有Heart㗎！
旺角試人氣
約好在熙來攘往嘅行人街道上拍攝，雖然拍攝前一日Pinky無瞓過，不過一Roll機，Pinky好似叉足電咁，不停擺出各款誘人Pose，影咗幾張相做熱身後，Pinky睇番啲相，問我哋件衫會唔會黑過頭，影響咗構圖，問使唔使即刻買過件？嘩，好感動啫！
喺旺角行人專用區正式埋位影相，不消1分鐘（小記精確計過），近百行人原本向前走，統統突然停步回望Pinky，尤其一班麻甩仔麻甩佬，手機、DC紛紛出籠，向着呢位美女不停閃，男女老幼均向Pinky圍作一團，爭相埋身、攞簽名、合照，只見Pinky從容不迫，一一答應，還報以四萬咁嘅笑容，果然係見慣大場面嘅亞視一姐，有風度！
香港道路零知識
試完人氣影埋沙龍，跟手我哋驅車到人煙較少嘅畢架山，準備上山慢慢解構Pinky—架愛驅。點知伊人回應一句：「係咪窩打老道山隔籬嗰度？我唔識㗎！」嘩！雖然兩者都有個「山」字，但係距離差好遠啫！小記繼續引導她對畢架山嘅認識，隨即問識唔識去石硤尾？點知都係得嗰句，「唔識呀，不如你帶路！」
《成龍盃》跑尾三
「其實我畀人嘅感覺係好飲得、好大膽、手車好辣等，但呢啲統統都唔係我本色，其實我揸車好斯文同小心，從來唔會飛車，可能因為我份人性急啩，所以更加要提醒自己點急都好，揸車一定唔可以急，因為生命無Take2！記得以前參加過《成龍盃》，人人以為我係大熱門，點知跑尾三呀！」
雖然安全第一，但就算點小心都好，一啲突如其來嘅意外，就真係避都無得避，「記得上年，我喺清水灣剛剛停車等轉右，點知嗰刻後面架車突然撞埋嚟，佢架車就傷啦，成個車頭爛晒，我架車就只係傷咗少少，所以意外就係意料之外囉！」
睇《蘋果》揀車
上到畢架山頂，冷風比旺角更強，幸好陽光照住感覺和暖得多。Pinky除下外套擺出各種Pose，還不停問我哋隻腳咁擺好唔好、件衫好唔好睇等，佢話唔怕煩試多幾個Pose，最緊要影出嚟效果靚！
以為Pinky只對自己嘅身形緊張，原來對車嘅外形一樣咁高要求，「我買車唔鍾意太大路，外形亦要夠獨特先襯得起我，所以揀車一定先睇佢嘅賣相！」像積架系列車款，一向予人感覺斯文同典雅，不過今次Pinky買嘅積架X-TypeSpirit，就貪佢當時夠新款同少人買，「年半前曾想買寶馬325i，不過要成58萬，咁啱《蘋果日報》介紹呢款積架新車，價錢只係30幾萬，覺得又抵又型，成架車都好有線條美感，配合埋車頭嗰隻美洲豹，感覺好深藏不露，似晒我呀！」
車廂調情最浪漫
Pinky不自覺透露，最享受車廂中與男友談情嘅時光，「我覺得拍拖有架車係好正㗎，因為車廂內係一個完全屬於我同男友嘅私人空間，尤其鍾意男友揸車、我就喺隔籬聽歌，嗰種感覺好浪漫、好Privacy！」乘機問Pinky，呢架積架可有載過心儀男士？點知Pinky答道：「梗係無啦，呢年幾都無拍拖啦！」雖未有適合男伴坐上Pinky這架積架，但相信Pinky心中都是等待着這個型男出現！
簡約主義雜物少
X-TypeSpirit全港僅得30部
自積架代理引入專攻年輕用家的X-Type後，曾先後推出多個特別版，在05年初推出的X-Type2.1Spirit特別版，更瞬間成熱賣車款。全球限量生產200部，香港配額佔了當中30部。外形充滿跑味，皆因廠方為其加裝了全車包圍、格網狀鬼面罩、18吋跑車合金胎軨、車尾定翼及經電鍍拋光的排氣喉等等，全都是為了吸引型男索女買家的目光。引擎則是一台2.1公升V6引擎，馬力及扭力輸出充裕，加上配備了5前速自動波箱，縱使推着車重達1.5公噸的身軀攀上大斜路，也給人從容不迫之感。
積架X-TypeSpirit規格
引擎：2,099c.c.V6
馬力：156ps/6,800rpm
扭力：20.4kgm/4,100rpm
傳動：5前速自動波，前輪驅動
當年車價：約36萬元
現時二手價：約23萬元起