期油係咁跌，花旗股市終於威番日，前晚炒上去，加埋啲好有炒味嘅納指股，升起上嚟個勢好靚。
期油跌落52美元，沽盤咁狠，會試穿埋50美元先會有反彈，仲會係好急嗰隻，挾一轉淡倉再插過，呢個情景會喺昨晚定下禮拜一出現，對港股有好大分別，如昨晚期油先跌後反彈，美股可能掉轉走，咁樣下禮拜一港股淡友可能會反攻；如昨晚油價跌落50美元邊，淡友唔插穿50美元，咁樣試穿50美元一幕應該會喺下禮拜一先上映，咁下禮拜一港股就可以試吓19700至19800嘅阻力區。
港股昨日雖然升咗200幾，但係喺高位沽盤壓得好實，下個禮拜初就算推上去，可唔可以一舉升破10日線都有疑問，近排好淡雙方搏擊得咁激烈，雙方都要靠外圍個勢做嘢，港股走勢仍會好飄。
恒生（011）個勢好勁，昨日追貨盤好多，股價升近110元關，報收109.60元，升1.29%，C輪1318已破90仙，高收94仙，槓桿效應加埋引伸波幅上升，下個禮拜仲有好大上升空間，恒生自己造好之外，亦帶動本地銀行股炒上。
東亞C輪1356：東亞（023）上升幅比恒生仲大，無他，股價細啲嘅關係，報收45.55元，升3.8%，成交比前日多1倍有多，技術呈突破，短線會推向50元，破位睇53元。東亞C輪1356昨收97仙，槓桿率4.7倍（有效3.8倍），正股升上50元，1356會喺1.35元樓上，正股升上53元，隻輪應該唔會低過1.63元，正股跌穿43.80元止蝕。
俊樺