上回講到，幫禮賓府睇風水嘅龍師傅，同特首曾蔭權識於微時。但係二人命途各異，當煲呔飛黃騰達嘅時候，龍師傅就隱姓埋名，全港嘅著名風水師都唔識得呢位老行尊。偏偏機緣巧合，八方喺冥冥中得見龍師傅尊容，真係三生有幸。
龍師傅係一位滿頭花白嘅敦厚長者，戴眼鏡，西裝筆挺。八方係喺禮賓府風水DVD嘅封面上見到佢副尊容，封面仲印上一啲重要嘅風水資料，例如禮賓府行門方向同煲呔張寫字枱嘅座向，仲有特首伉儷入伙嘅吉時。
阿涂要求睇碟
所謂天機不可洩漏，煲呔固然唔想隻碟傳到咁行，連立法會主席范徐麗泰都拒絕投訴人嘅要求，唔肯將隻碟傳閱畀全體議員。立法會保安事務委員會副主席涂謹申就覺得事有蹺蹊，已經去信范太要求睇碟。阿涂擔心，禮賓府嗰筆接近千五萬蚊嘅裝修費，就係因為要就住啲風水而搞到咁貴。佢話范太唔應該自己睇咗隻碟就算，禮貌上都要知會議員有件咁嘅事。
禮賓府風水關係到特區領導人嘅禍福，就算煲呔冇用公帑睇風水，全港市民都好關心煲呔擺咗個咩陣。但背負住虔誠天主教徒之名嘅煲呔，始終唔肯公開談論風水。佢噚晚出席新聞行政人員協會（NEA）20周年晚宴，記者連續問佢兩次禮賓府有冇搵人睇風水，煲呔第一次扮失聰答：「咩話？」第二次就無厘頭用普通話講：「開玩笑！」明顯有意迴避。
NEA贈字畫
晚宴有好多高官同行政會議成員出席，周梁淑怡幫煲呔開脫，話全世界嘅建築師都會搵人睇風水，咁做唔一定係迷信。新聞行政人員協會送咗幅題字畀煲呔，係出自前主席韓中旋嘅手筆。韓老贈咗八個字畀煲呔：「息機知機，和合為福。」即係叫煲呔做人唔好咁多機心，最緊要和和氣氣。