叫我入西貢食一碗糖水，費時失事咗啲啫！某日行沙田新城市，見阿「瞞」記開咗間分店，咁就腳就食番碗湯圓啦！
晚上8、9點，正值食甜品時間，舖面大條人龍，等咗15分鐘入座可接受！300呎小舖，坐客近半百，中間兩張16人大長枱，簡直插針不入，侍應猛叫我坐低落單，左碰右撞幾經辛苦先坐低，感覺去咗人民公社食大鑊飯（好彩佢用碗唔用?口盅啫）！
先點麻蓉湯圓！侍應答：「對唔住！只有兩溝！」一肚氣！心諗快快食完快快走；再呆等15分鐘湯圓上枱，先開是3粒花生，再開亦是3粒花生，咁嘅彩數，我以後仲使買六合彩嘅？谷鬼氣！向侍應大興問罪之師，「你啲Random湯圓，點解粒粒都係花生？」答：「我哋冇純花生或麻蓉湯圓，我哋將兩種餡料撈埋落一粒整！」一早向顧客解釋清楚，就唔使我白叫吖！再講，餡料花生多過麻蓉，麻蓉味全被蓋過。
為咗方便經營，唔理顧客需要，已經好唔啱！以往入西貢食糖水，就是為咗一片閒適，為生意而變身「大鑊飯」，「瞞」記真係變咗囉！