股市風高浪急，早前升到好似斷線風箏嘅「五行三保」難逃一跌，再次證明世上無嘢可以抵抗地心吸力。有網民喺《香港討論區》做咗個「蟹貨」投票，仲好抵死咁用「四蟹集團」（註：應是指《大時代》電視劇中的「五蟹集團」）為題。
國壽高票膺蟹王
喺呢個蟹貨投票上面，A股升到拆天嘅中國人壽（2628）一直節節領先，截至11日下午止，有成40%人投咗佢一票，佢個代號就當然係「丁蟹」啦！至於內地最大銀行工商銀行（1398），就有23%人投佢神聖嘅一票，而佢個代號就係丁蟹個大仔「孝蟹」嘞！
至於其他中資金融股，則用丁蟹其他寶貝仔「旺蟹」、「利蟹」同「益蟹」做代號，分別代表中國銀行（3988）、建設銀行（939）同埋交通銀行（3328），分別有20.95%、7.62%及7.62%人投佢哋一票──真係通街都係蟹。
大行又點睇呢？其實啲大行一踏入07年就大大聲咁叫人沽貨。好似最早喺1月3日叫人沽五行三保嘅瑞信證券，就叫投資者小心中國金融類股份，因為呢類高增長、高估值股，稍有差池就好易出現調整。由於現價已不能支持估值，所以叫投資者「減持」相關股份。
大行唱淡踩多腳
大摩就喺5號嘅報告度講，中國調高銀行準備金，對中國概念股構成負面影響，中國嘅銀行同埋保險股將會首當其衝，因為呢兩類股份嘅股價已嚴重超過實際價值。大摩仲提醒投資者，千萬唔好睇小北京要一樣嘢停低落嚟嘅能力，尤其係當佢哋好想咁做嘅時候。
「細摩」摩根大通仲直接，佢哋喺7號出街嘅報告，叫人暫時唔好掂中國銀行股，話投資者可以喺未來幾個月，搵到一啲更加好嘅上車時間；仲話任何令市場失望嘅消息，同埋負面嘅宏觀經濟新聞，將會構成巨大嘅負面氣氛，亦會成為沽貨獲利藉口。
近排港股跌多升少，中資金融又係咁，仲有過之而無不及！之前網上都曾經搞過一個投票，叫人表態點睇中資金融股後市，大部份人都係睇淡居多，雖然唔少人預期大戶基金已經沽完貨，但就估計會唔上唔落一段日子。你又點睇呢？