里安納度狄卡比奧（LeonardoDiCaprio）近年已由萬人迷青春偶像，進化成能夠挑戰唔同角色嘅實力派演員，佢今年仲憑《無間道風雲》（TheDeparted）同《血鑽》（BloodDiamond）叫雙飛，獲金球獎最佳男主角兩項提名，其中喺《血》片扮演嘅非洲前僱傭兵，滿口唔鹹唔淡英文，為角色增加唔少新鮮感。最令人驚喜係套片有message之餘又唔會口水多過茶，做到節奏緊湊，真係一套唔錯嘅娛樂大片。撰文：戶川淳
今個星期四（18日）喺本地上映嘅《血鑽》，以1999年被內戰炮火圍困嘅非洲窮國塞拉利昂為背景，嗰度都係非法開採同交易鑽石嘅重要集散地。故事主線並唔係由男主角里安納度狄卡比奧開始，而係演技比佢更加出色嘅狄哲文侯蘇（DjimonHounsou）嘅一段父子情，仲好細膩感人同深刻。
叛軍捉漁民採礦
本來靠打魚維生嘅狄哲文，有日慘被當地叛軍破壞家庭，仲被人捉咗去做採石工，搞到妻離子散，而佢最錫嘅囝囝就被訓練成殺人機器。有日狄哲文喺礦井下發現一粒被稱作「血鑽」嘅稀有粉紅鑽石，喺混亂之際佢將鑽石埋喺地下。
震撼主題具內涵
里安納度以幫狄哲文打探家人下落嚟交換對方合作，好讓自己憑呢粒巨鑽賺取巨利而唔使再做走私生意，於是兩人夾喺政府軍同叛軍嘅炮火之間，仲認識到深入調查非法開採鑽石內幕嘅女記者珍妮花康納莉（JenniferConnelly）。
曾拍《最後武士》（TheLastSamurai）嘅導演愛德華施域（EdwardZwick），今次勝在成功結合娛樂性同內涵，揭開大眾覺得閃亮奪目嘅鑽石首飾背後，隱藏嘅觸目驚心走私、罪案同戰亂嘅複雜關係。
導演仲將一個沉重嘅政治主題，拍得充滿血腥味同驚險感，當中一班非洲細路被訓練成殺人機器，震撼程度直迫巴西名片《無主之城》（CityofGod）。