早排有人見到無綫高層陳志雲喺半島酒店開「志雲飯局」，嘉賓係林峯、高層樂易玲同英皇高層吳雨。當日佢哋喺酒店密斟兩個鐘，咁神秘，究竟傾乜呢？
保留經理人約
馮仁昭聽聞原來英皇睇中林峯，想捧佢做歌手，事關近年英皇旗下男歌手發展欠佳，謝霆鋒、吳浩康、李逸朗、關智斌同SunBoy'z有幾唔得毋須多講，既然捧唔掂自己友，惟有搵外援幫拖。
林峯唱歌跳舞OK，加上佢仲孭飛主演60集重頭劇《歲月風雲》，如果英皇真係簽佢，間接令公司同無綫關係更添友好，一舉數得，唔怪得之英皇好似債主咁，日日追住無綫簽林峯。聽聞無綫已經將林峯嘅唱片約簽畀英皇，但經理人約當然唔益佢哋啦。
𠵱家林峯日夜趕拍《歲》劇，前日下晝，佢同佘詩曼喺跑馬地拍外景，場戲係講阿佘揸車差啲撞到佢，睇嚟林峯對阿佘手車好有信心，衝出馬路時一啲都冇騰雞，表現都算專業。
黃宗澤冇下文
林峯簽約英皇，有冇機會唱紅就拭目以待，反觀佢位死黨吳卓羲就慘咯，因為唱歌渣兼舞技水皮，上台又唔拉褲鏈，舉動𤓓到嘔，簽佢嘅BMA唱片公司俾人笑到面黃，已經同佢結束合作關係，本來唱得兩嘴嘅黃宗澤舊年傾緊BMA，但多得吳卓羲帶挈，搞到BMA怕咗簽藝員，同黃宗澤傾到冇咗下文㖭。
