FCC（外國記者會）寄來十一月/十二月號會刊，內有一篇文章講《南華早報》去年炒人引起嘅風波，將總編輯MarkClifford嘅memo與被炒之NiallFraser（星期日《南華早報》編輯）嘅「紀念頭版」刊登出嚟，睇落十分過癮。
左丁山唔係想講《南早》內部政治，而係FCC嘅文章講到，《南華早報》今日與過往大大不同，隨着老編輯RobinHutcheon喺八十年代退休，《南早》已過咗黃金日子，嗰陣時，喺《南早》工作，好似「浸在熱水浴中咁享受」（luxuriatinginawarmbath）。
𠵱家在報館工作，隨時有冷水照頭淋嘅情形出現，想話享受熱水浴呀，明日請早，買番張三Ｔ先啦。一次獨中會有五千萬元，今晚可以發定夢先。
想想吓，左丁山勾起咗甜蜜回憶，領悟到呢個世界有半壟斷，壟斷真係好，做職員唔知幾過癮。以前喺銀行工作，貸款畀好客戶收Ｐ加二，最好客戶收Ｐ加一，以最優惠利率（Ｐ）借錢嘅客戶，只有電燈公司、煤氣公司等大藍籌。地鐵公司初初開始時，借錢要由政府擔保，利率係Ｐ加二，你話嗰陣時銀行賺錢幾容易呢，故此左丁山做銀行trainee可以日日到不同部門受訓，兩年內行行企企全無貢獻，相等於收份好人工去上課，盞鬼到極；一位同事，大膽到日日三點半就去咗於仁行GiGi嘆茶，逢星期五下午就飛咗去馬尼拉歡樂，老闆費事理。
俱往矣，有競爭，職員就冇福利，今日銀行職員要上街派傳單爭存款，爭按揭，借錢畀地鐵，收四十點息差都會俾佢嘅CFO鬧死！一位世姪到銀行返工唔夠一個月，就有salesquota，要搵佢老竇幫手，呢位廿四孝老竇又周圍打心口（包括左丁山在內），要一眾世叔伯幫忙，你話打銀行工幾辛苦。
《南早》當年印報紙當印銀紙，高峯時期，印「搵食廣告」印到朝早四五點，資深編輯可以有一年有薪長休（sabbaticalleave），點同𠵱家捱得咁辛苦吖。諗諗吓，身為打工仔，好懷念以前嘅「為位餵」環境，有壟斷直情好過有競爭！