好多人都話墳場陰氣重，若果層樓喺墓地附近，見鬼嘅機會特別多。上網搵到個鬼古，話新界區有一私人屋苑和墳場只係「一溝之隔」，屋苑經常傳出鬼怪事，其中一個係講一家三口嘅張姓住客，搬入去後，經常覺得啲食物淡而無味，個仔又話夜晚有位鍾意飲汽水嘅姐姐陪佢玩！原來嗰位姐姐每晚都喺廚房同佢個仔又食又玩，玩完後雪櫃嘅汽水仲移晒位㖭！正因為啲嘢食被姐姐食過，所以張生覺得啲食物冇味！後來佢哋搬走咗，張生嘅味覺就恢復番晒！究竟住近墳場係咪惹鬼？方海閱師傅話，風水學嚟講，住近墳場犯了孤陰之煞，若本身陰氣重，自然易撞鬼，唔想撞到邪嘢，可以喺望到墳場嘅位置，放個鍾馗像或一幅鍾馗嘅畫像。
記者：區佩嫦
網址： http://www.buddheart.com/phpbb/viewtopic.php?t=3511