未知是否近日被人窒到透不過氣，容祖兒昨日發燒，缺席無綫《勁歌》總選拜神儀式，稍作休息之餘，兼避免與曾志偉同場。不過李克勤就非常期待今晚的頒獎禮，更形容會是一個戰場，要看看志偉如何應對，志偉則平靜地表示最重要是做好節目。
曾志偉、陳奕迅（Eason）、古巨基、李克勤與薛凱琪（Fiona）等昨日出席在紅館舉行的《2006年十大勁歌金曲頒獎典禮》拜神儀式，最近志偉與容祖兒勢成水火，不時隔空單打，容祖兒本已應允出席昨日記招，但最後卻以發燒為由缺席，少了一個擦出火花的機會，對於祖兒因病缺席，志偉說：「係咩！咁聽日先見囉。」
做好節目為先
不過旁邊的克勤形容今晚的頒獎禮會是一個大戰場，他笑說：「真係想睇吓志偉同阿邊個……最近佢咁多火頭，邊個就唔好講啦，志偉喺我心目中係一個殿堂級主持人，我都想睇吓佢點樣應對，藝人有興趣成為司儀嘅話，呢個係一個好好嘅觀摩機會。」
問到志偉在今晚的頒獎禮上會否因為最近與祖兒的是非而有所避忌？志偉說：「我會以最平常嘅平常心去做，唔會避忌，可能更親切啲呢？我只係想做好個節目，大家唔好諗錯。」
無綫綜藝及音樂科高級經理陳家揚被問到會否吩咐志偉不要爆肚時說：「都會叫佢講嘢小心啲，唔好爆咁多肚，其實佢個形象係搞笑，都做咗咁多年主持，今年咁多是非係佢唔好彩啫。」由於今年所有歌手都會坐在台上，所以祖兒與志偉定有機會同台。
懶理婚訊換獎
此外，對於陳慧琳（Kelly）有意在《勁歌》頒獎禮上宣布婚訊搶奪最受歡迎女歌星獎，為了成全Kelly，其唱片公司惟有犧牲陳奕迅，對於有關傳聞，Eason謂：「我一向都唔理呢啲傳聞，都唔覺得頒獎禮係咁兒戲。」對於也被指以婚訊作為得到男歌手條件，基仔則說：「我都講過暫時唔會結婚。」
採訪：胡比
攝影：陳偉權
